Ýnıversıada-2019: Qazaqstan bendı quramasy tartysty básekede Norvegııany utty

ASTANA. QazAqparat - Krasnoıarsk qalasynda ótip jatqan HHІH qysqy dúnıejúzilik ýnıversıadada dopty hokkeıden Qazaqstan quramasy sheshýshi kezdesýin norvegtermen ótkizdi, dep habarlaıdy QazAqparat tilshisi.

Ýnıversıada baǵdarlamasyna alǵash ret engizilgen bendı týrnırine barlyǵy bes eldiń quramasy qatysýda. Sonyń ishinde tórteýi jartylaı fınalǵa joldama alady.

Munyń aldynda qazaqstandyqtar úsh, norvegter eki matchta qarsylastarynan jeńilip qalǵan edi. Sol sebepti bul negizinen «Aqjaıyq» hokkeıshilerinen quralǵan Qazaqstan úshin sońǵy múmkindik bolatyn.

«Enıseı» stadıonynda oıyn bastalysymen alǵa umtylǵan qazaqstandyqtar buryshtamadan berilgen dopty sátti paıdalana aldy. Qýanysh Temirálınniń pasynan keıin komanda kapıtany Maksım Ótebalıev esep ashty.

Kóp uzamaı Ámir Qadyrhanov aıdynnan qýylǵan kezde norvegterden Eırık Lýnden tarazy basyn teńestirdi. Degenmen M.Ótebalıevtiń pasynan keıin Andreı Gýşın Qazaqstandy qaıta alǵa shyǵardy.

Ekinshi taımda Bolat Muhıt aıyp ýaqytyn ótegen mezgilde Stıan Staerkebı mergendik tanytty - 2:2.

Norvegter oıyn tártibin buzǵannan keıin M.Ótebalıev 12 metrlik aıyp dobyn dál oryndady - 3:2. Osydan keıin esep ózgergen joq.

Endi 6 naýryzda Fınlıandııa - Reseı, sosyn 7-sinde Norvegııa - Fınlıandııa machtarynan keıin júldeli oryndarǵa talasatyn komandalar belgili bolady.

Eske sala keteıik, budan buryn Qazaqstan quramasynyń alǵashqy matchyn reseıliktermen ótkizetinin, odan keıin olardan jáne fınderden jeńilip qalǵanyn jazǵan bolatynbyz. Sondaı-aq keshe Shvetsııadan iri eseppen utyldy.