Ýnıversıada-2015: Qazaqstan altyn medaldar sany jaǵynan óz rekordyn jasady

Osydan birer saǵat buryn shildeniń 3 kúni Ońtústik Koreıanyń Kvandjý qalasynda jalaýy jelbiregen alaman dodanyń alaýy sóndi. Oǵan álemniń 146 elinen kelgen 12896 sportshy saıystyń 21 túrinen baq synap, 272 medal jıyntyǵyn sarapqa saldy. Bul jarysqa Qazaqstannan 95 sportshy qatysyp, 6 altyn, 4 qola medalmen jalpy komandalyq esepte 11-oryndy jeńip aldy.

Birden aıta keteıik, Qazaqstan quramasy jazǵy Dúnıejúzilik Ýnıversıada tarıhynda bıyl birinshi ret altyn medaldar sany jaǵynan eń úzdik nátıjege qol jetkizip, óz rekordyn jasady. Al buǵan deıin 2007 jyly Bangkok qalasynda 5 altyn medalmen jalpy komandalyq esepte taǵy da 11-oryndy ıelengen bolatynbyz.

Tórtkúl dúnıeniń ár qıyrynan jınalǵan stýdentter akademııalyq esý, badmınton, basketbol, beısbol, voleı­bol, golf, dzıýdo, jeńil atletıka, júzý, kórkem gımnastıka, qol doby, nysana kózdeý, sadaq atý, semserlesý, sporttyq gım­nastıka, sý doby, sýǵa sekirý, taek­vondo, tennıs, ústel tennısi, fýtbol se­kil­di sport túrleri boıynsha saıysqa tú­sti.

Qazaqstan Ulttyq quramasynyń qorjynyna alǵashqy altyn júldeni júzýshi Dmıtrıı Balandın (júzý, 100 metr, brass) saldy. Osydan keıin ol brass ádisimen 50 metr qashyqtyqta qola júldeni enshiledi.

Qazaqstannyń Ýnıversıadadaǵy «jaryq juldyzyna» aınalǵan jeńil atlet Vıktorııa Zıabkına bir ózi Qazaqstan qorjynyna 3 altyn júlde saldy. Ol jekeleı synda 100 jáne 200 metr qashyqtyqta chempıon atandy. Sonymen qatar, komandalyq estafetada (4h100) Anastasııa Talapına, Svetlana Ivanchýkova jáne ıÝlııa Rahmanovamen birge Ýnıversıada jeńimpazy boldy.

Osyǵan qosa taekvondoshy Nursultan Mamaev pen syryqpen sekirýshi Nıkıta Fılıppov ta jeńistiń eń bıik satysyna kóterilip, 5-6-altyn júldemen Qazaqstan quramasyn jalpy esepte 11-orynǵa kóterilýine óz úlesterin qosty. Al taǵy úsh qola júldeni dzıýdoshy Janar Qashqyn (70 keli) men stendik atýdan erler jáne áıelder quramasy ákeldi.

6 altyn medaldyń beseýin Ál-Farabı atyndaǵy QazUÝ stýdentteri jeńip aldy. Dúnıejúzilik Ýnıversıadanyń tarıhyna úńilip qaraıtyn bolsaq, osyǵan deıin osyndaı kóp kólemdi altyn medaldardy bir joǵary oqý ornynyń stýdentteri alyp kórmegen eken. Demek bul da bıylǵy dodadaǵy basty jańalyqtardyń biri deýge tolyq negiz bar.

Osy jerden sál sheginis jasap, Qazaqstan derbes komanda retinde Dúnıejúzilik ýnıversıadaǵa qatysqan 1993 jyl­dan bergi kórsetkishterine qysqasha toqtala ketkendi jón kórdik.

1993 jyly AQSh-tyń Býffalo qalasynda ótken jarysta jerlesterimiz jalǵyz kúmis medaldy ıelenip, Armenııa, Brazı­lııa, Estonııa, Lıtvamen birge 31-35-oryn­dardy ózara bólisti. Munda AQSh 73 (31 altyn+23 kúmis+19 qola) bas júldeni, Qytaı (17+6+5) ekinshi oryndy, Kanada (11+13+14) úshinshi oryndy ıelendi. 1995 jyly Japonııanyń Fýkýoka qalasynda Qazaqstan 2 kúmis medal oljalap, 33-oryndy mise tutty. Birinshi oryndy amerıka­lyqtar (24+28+17), ekinshi oryndy japondar (24+16+24), úshinshi oryndy Reseı quramasy (15+12+23) jeńip aldy. Al Qazaqstan quramasy 1997 jyly jáne 1999 jyly ótken Dúnıejúzilik ýnıversıadada birde bir medalǵa qol jetkize almady. 2001 jyly Beıjińge sapar shektik. Onda Qazaqstannyń úsh sportshysy kúmis medalǵa ıe bolyp, jalpy esepte 33-orynǵa jaıǵastyq. Bul jarysta Qytaı qurama­sy 103 (54+24+25) bas júldeni olja­la­sa, AQSh (21+13+13) ekinshi satyǵa syr­ǵydy. Reseı (14+18+21) úshinshi oryndy ıemdendi. 2003 jylǵy Ońtústik Koreıanyń Tegý shaharynda ótken dodada Qazaq eliniń ánurany alǵash ret shyr­qaldy. 2 altyn jáne 4 kúmis medal enshilep, jalpy esepte 18-orynǵa kóterildik. Osylaısha, Qazaqstanda stýdenttik sporttyń órleý kezeńi bas­taldy. Jal­py esepte Qytaı (41+27+13) qaı­ta kósh bastasa, Reseı (26+22+34) men ja­rys qojaıyndary (26+12+17) ekin­shi jáne úshinshi oryndarda ıelendi. 2005 jyly Túrkııanyń Izmırinde ótken básekede Qazaqstan quramasy 1 altyn, 2 kúmis jáne 6 qola medalmen 26-orynǵa turaqtady. Túrkııada Reseı stýdentteri 65 (26+16+23) kósh bastady. Bul Reseı sportshylarynyń óz tarıhynda tuńǵysh ret jalpy esepte kósh bastaýy edi. Odan keıingi satyǵa Qytaı (21+16+12) men Ja­ponııa (18+18+20) jaıǵasty. 2007 jyly Taılandtyń astanasy - Bangkokta Qazaqstan quramasy joǵaryda atap ótkenimizdeı buryn-sońdy bolmaǵan kórsetkishke qol jetkizdi. 5 altyn, 4 kúmis jáne 5 qolany qanjyǵasyna baılap, tuńǵysh ret myqtylar tiziminde 11-orynǵa kóterildi. Al­ǵashqy úshtikte Qytaı (32+29+26), Reseı (28+27+37) jáne Ýkraına (18+20+18). Biz mine osy rekordty bıyl jańalap otyrmyz. 2009 jyly Belgradta 1 altyn, 2 kúmis jáne 4 qolany qorjynǵa salǵan jerlesterimiz 32- orynǵa taban tiredi. Bul jylǵy doda Reseıdiń (29+22+27) jeńisimen aıaqtaldy. Odan keıingi tuǵyrda - Qytaı (22+21+15) men Ońtústik Koreıa (21+11+15).

2011 jyly Qytaıdyń Shenchjen shaharyna 3 kúmis jáne 3 qola medalmen qazaqstandyqtar 45-orynǵa bir-aq syrǵydy. Jarys qojaıyndary (75+39+31) bas júldeni, Reseı (42+45+45) ekinshi oryndy, Ońtústik Koreıa (28+21+30) úshinshi oryndy ıelendi. 2013 jyly Tatarstannyń Qazan qalasynda ótken Dúnıejúzilik synda Qazaqstan quramasy 3 altyn, 11 kúmis jáne 16 qola medaldi ıelenip, 19-orynǵa qaıta kóterildi. Qazanda Reseı quramasy (155+75+62) kósh bastady. Ekinshi jáne úshinshi oryndarda - Qytaı (26+29+22) men Japonııa (24+28+32) ózara bólisti.

Al bıyl jerlesterimiz jaqsy qyrynan kórinip, jalpy esepte álem boıynsha 11-orynǵa qaıta kóterildi. Bulda bolsa elimizde sporttyń damyp kele jatqandyǵynyń belgisi.

Bıylǵy Ýnıversıadada úzdik óner kórsetken memleketter:

Oryn

El

Altyn

Kúmis

Qola

Jalpy

1

O.Koreıa

44

28

26

98

2

Reseı

32

37

44

113

3

Qytaı

29

21

15

58

4

Japonııa

20

19

28

66

5

AQSh

18

15

18

51

6

Frantsııa

13

9

8

30

7

Italııa

10

14

17

41

8

Iran

7

2

6

15

9

Ýkraına

6

15

5

26

10

Taıbeı

6

12

17

35

11

Qazaqstan

6

0

4

10

Avtor: Kúnsultan Otarbaı