Unity tankerindegi qazaqstandyq teńizshi Úndistannan ketti
ASTANA. KAZINFORM — Úndistannyń Paradıp portynda ustalǵan MT UNITY tankeriniń ekıpajyndaǵy qazaqstandyq teńizshi Úndistannan ketti. Bul týraly Qazaqstannyń Syrtqy ister mınıstrligi málimdedi.
— Úndistannyń Paradıp portynda ustalǵan MT UNITY tankeriniń ekıpajyndaǵy qazaqstandyq teńizshi kemeden shyqty. Ol Delıge ushyp baryp, keıin Úndistan aýmaǵynan shyqty, — dep habarlady QR Syrtqy ister mınıstrligi.
Qazaqstandyq dıplomattar azamatymyzǵa konsýldyq-quqyqtyq qoldaý kórsetti.
Buǵan deıin Úndistan jaǵalaýynda ustalǵan Unity tankeriniń ekıpajyndaǵy qazaqstandyq teńizshi kemeden shyǵyp, elden ketetini habarlanǵan edi.
Sheteldik BAQ-tyń habarlaýynsha, Unity tankeri 11 mamyrdan beri Úndistannyń Paradıp porty mańyndaǵy zákir turaǵynda qamaýda tur. Keme Kamerýn týymen júzedi.
Teńizshilerdiń týystary tankerdiń ıesi Bluetide Charters FZE kompanııasy ekenin aıtady. Olardyń málimetinshe, kemeniń uzaq ýaqyt boıy turaqta turýy kezinde ekıpaj azyq-túlik pen aýyz sý tapshylyǵyna tap bolǵan. Sondaı-aq baılanys úzilgen jáne tehnıkalyq aqaýlar bolǵan.
6 qazanda Orıssa shtatynyń Joǵarǵy soty Úndistan bıligin Unity ekıpajyn otanyna qaıtarý úshin shuǵyl sharalar qabyldaýǵa mindettedi.
Kemede Reseıdiń 20 azamaty, sondaı-aq Mysyr men Qazaqstannyń teńizshileri boldy. Sot Úndistannyń saýda teńiz qatynasy týraly zańyna súıene otyryp, keme ıesi ekıpajdy qajetti kómeksiz qaldyrǵanyn moıyndady. Úndistan tarapyna teńizshilerdi kemeden túsirýdi, elderine qaıtarýdy jáne ekıpajdy aýystyrýdy múmkindiginshe qysqa merzimde uıymdastyrý tapsyryldy.
17 qyrkúıekte Qazaqstan Syrtqy ister mınıstrligi tankerdiń ustalǵanyn rastady. Sondaı-aq jaǵdaıdy retteýge járdemdesý týraly ótinishpen Úndistan tarapyna dıplomatııalyq nota joldanǵanyn habarlady.
