United Cup týrnıri: Elena Rybakına bastaǵan Qazaqstan quramasy pleı-off kezeńine shyqty
ASTANA. KAZINFORM — Aýstralııanyń Sıdneı jáne Pert qalalarynda tennısten aralas komandalyq synda ótip jatqan United Cup týrnıriniń S tobynda Qazaqstan quramasy Grekııany tize búktirdi.
Ekinshi oıynda álemniń 6-raketkasy Elena Rybakına men dúnıejúzilik reıtıngide 32-orynda turǵan Marııa Sakkarı sheberlik baıqasty.
M.Sakkarı — kezinde álemdik reıtıngide 3-satyǵa deıin kóterilgen tennısshi.
Birinshi partııany Rybakına breıkpen túıindeı aldy — 6:4.
Ekinshi sette Elena birden breık jasap, alǵa ketti — 2:0. Taǵy bir breık — 4:0. Degenmen matchqa dop bergende, Sakkarı breık jasap ketti — 2:5. Báribir jeńis Rybakınanyń enshisinde qaldy — 6:3.
Bir saǵat 23 mınýtqa sozylǵan báseke barysynda E.Rybakına 7 eıspen birge 8 breık-poınttyń úsheýin múltiksiz paıdalandy. M.Sakkarı 2 eıspen, 1 breıkpen (4 breık-poınt) shekteldi.
Osylaısha, Qazaqstan — Grekııa matchynda E.Rybakına esepti 2:0-ge jetkizdi.
Sóıtip úshinshi, juptyq básekeniń keregi bolmaı qaldy.
Qazaqstan quramasynyń kapıtany tájirıbeli tennısshi Aleksandr Nedovesov bolsa, Elena Rybakınanyń oıynyn bapkeri Goran Ivanıshevıch te baqylap otyrdy.
Óz tobynda Ispanııa men Grekııany joldan taıdyrǵan Qazaqstan pleı-off kezeńine joldama aldy. Qazaqstandyqtar jańa jyldyń alǵashqy kúni shırek fınalda E tobynda (Qytaı, Brazılııa jáne ótken jylǵy jeńimpaz Germanııa) 1-oryn alǵan quramamen oınaıdy.
Eske sala keteıik, budan buryn tennısten United Cup týrnırinde Aleksandr Shevchenkonyń álemniń 11-raketkasyn jeńgenin jazǵan bolatynbyz.