Unico Play — qazaq serıaldary, biregeı kontent, jasandy ıntellekt jáne álemdik klassıkanyń ulttyq strımıngi

ASTANA. KAZINFORM — Unico Play platformasy serıaldar men álemdik premeralardyń qazaqsha aýdarmasyn usynbaq.

Ulttyq strımıng — platforma Unico Play bıyl alty túpnusqa serıaldy tanystyrady, taǵy 23 joba óndiris satysynda tur. 

Qoldanýshylarǵa álemdik premeralar, túrik jáne koreı serıaldarynyń qazaq tilindegi aýdarmasy, otandyq kıno klassıkasy, sporttyq translıatsııalar jáne memlekettik tildegi eń iri balalar kontenti usynylady. 

— Unico Play — tolyqqandy óndiristik tizbek, jas stsenarısterdiń pıtchınginen bastap túpnusqa jobalardy túsirý, monetızatsııalaý jáne avtorlyq quqyqty qorǵaýǵa deıingi protsess. Bul qazaqstandyq jastar úshin «shyǵarmashylyq lıfti» deýge bolady, — dedi Uni-Q Group-tyń CEO-sy Dmıtrıı Gýdýmak.

Platforma qazaq, orys jáne aǵylshyn tilindegi ınterfeısti, 4K formatynda kórýdi jáne oflaın-tamashalaý múmkindigi bar. Bes qurylǵyǵa deıin qosý múmkindigin jáne jasandy ıntellekt negizindegi jeke usynys ta qaralady.

— Tek onlaın-kınoteatrdy iske qosyp jatqan joqpyz. Biz úshin mańyzdysy — mıllıondaǵan kórermen óz tilinde jańa oqıǵalardy tamashalaı alsa, al halyqaralyq aýdıtorııa bizdiń mádenıetpen tanyssa, — dep atap ótti Uni-Q Group-tyń CEO-sy Anar Júnisova.

Jazylym quny aıyna — 999 teńge, alǵashqy aı — tegin. Servıs búkil álem boıynsha smartfon, Smart TV jáne braýzerlerde bar.

— Qazaqstanda jahandyq servısterden qalyspaıtyn IT-platforma jasaýǵa bolatynyn dáleldedik. Platformany ázirleýge bir jyldan az ýaqyt ketti, — dedi Unico Play-dyń CEO-sy Dııas Dosmuhanbetov.

Bastamany «Dara» Prezıdenttik bastamalar qory qoldady.

Unico Play-dyń tusaýkeseri 12 qyrkúıekte Astanada, Qazaqstan kınosy kúni ótti. Jańa jobany iske qosylý aıasynda kórermenderge Kaspıı teńizin saqtaý jáne ekologııa máselesine arnalǵan «Qara bekire» dramasy kórsetildi.