Unico Play GEMA Asia Awards baıqaýynda Netflix pen Warner Brothers-ti basyp ozyp, eki júlde jeńip aldy

ASTANA. KAZINFORM – Unico Play onlaın-kınoteatry Qazaqstan tarıhynda alǵash ret entertainment-marketıng salasyndaǵy bedeldi halyqaralyq marapat — GEMA Asia Awards júldelerin jeńip aldy.

Joba eki nomınatsııa boıynsha marapattaldy: Best Integrated Marketing Campaign boıynsha altyn júlde jáne «Qara Bekire» serıalynyń úzdik posteri úshin kúmis júlde. Osylaısha Unico Play Netflix pen Warner Brothers sııaqty álemdik iri kompanııalardy artta qaldyrdy. 

Bul jetistik qazaqstandyq jobalardyń halyqaralyq deńgeıde básekege túsý qabiletin kórsetedi. Sarapshylar «Qara Bekire» jobasynyń ıdeıalyq mazmunyn, sondaı-aq Kaspıı teńizi, ekologııa jáne adam jaýapkershiligi taqyryptaryn ashyq ári batyl kótergenin atap ótti.

Qazirgi ýaqytta eki marapat Qazaqstanǵa jetkizildi. Bul Unico Play platformasynyń jáne elimizdiń jahandyq kásibı ortadaǵy ornyn nyǵaıtýǵa baǵyttalǵan mańyzdy qadam deýge bolady. «Qara Bekire» serıalynyń barlyq bólimi platformada qoljetimdi. 

Eske sala keteıik, buǵan deıin «Ańdar shahary 2» anımatsııalyq fılmi Gollıvýd tarıhynda buryn-sońdy bolmaǵan, eń joǵary kassalyq tabys jınaǵan anımatsııalyq týyndy atanǵanyn jazǵan edik.