UNICEF ókili Quryltaı depýtattarymen kezdesti
ASTANA. KAZINFORM — Quryltaı depýtaty, Halyqaralyq ister, qorǵanys jáne qaýipsizdik komıtetiniń múshesi Dana Medeýova BUU Balalar qorynyń (UNICEF) Qazaqstandaǵy ókili, doktor Rashed Mýstafa Sarvarmen kezdesti. Bul týraly Quryltaıdyń baspasóz qyzmeti málim etti.
Kezdesýge qatysýshylar Quryltaı depýtattary men BUU Balalar qory arasyndaǵy ózara is-qımyldyń negizgi baǵyttaryn talqylady. Bala quqyǵyn qorǵaý, ınklıýzıvti bilim berýdi damytý, densaýlyq saqtaý júıesin jetildirý máselelerine de basa mán berildi.
— Balalardyń quqyǵy men zańdy múddelerin qamtamasyz etý –Qazaqstannyń memlekettik saıasatynyń mańyzdy baǵyttarynyń biri. Osy saladaǵy máselelerge el Prezıdenti Qasym-Jomart Kemeluly Toqaev erekshe basymdyq beredi. Bala quqyǵy týraly konventsııa álemdik qoǵamdastyq úshin úlken mańyzǵa, sondaı-aq ol bizdiń Birikken Ulttar Uıymynyń Balalar qorymen (ıÝNISEF) yntymaqtastyǵymyzǵa da negiz bolyp sanalady, — dep atap ótti Dana Medeýova.
Kezdesý barysynda 2026-2030 jyldarǵa arnalǵan Eldik baǵdarlamany iske asyrý úshin zańnamalyq negizderdi nyǵaıtý, sondaı-aq «Qazaqstan balalary» tujyrymdamasyn iske asyrý máseleleri sóz boldy.
Doktor Rashed Mýstafa Sarvar Qazaqstannyń bala quqyǵyn qorǵaý salasyndaǵy eleýli jetistikterin atap ótip, balalar men jastardyń ómirin jaqsartýǵa arnalǵan bastamalardy keńeıtý boıynsha birlesken jumysty jalǵastyrýǵa daıyn ekenin aıtty.
Eske sala keteıik, buǵan deıin Quryltaıda Qoǵamdyq qabyldaý ashylǵan bolatyn.
