Únemshildik máselesin óńirler bir birinen úırenýleri kerek - Elbasy
ASTANA. 21 jeltoqsan. QazAqparat /Qanat Mámetqazyuly/ - Únemshildik máselesin óńirler bir birinen úırenýleri kerek. Búgin QR Prezıdenti Nursultan Nazarbaev elordada «Altyn sapa», «Paryz», «Innovatsııalyq serpin», «Indýstrııalyq serpin» syılyqtaryn tapsyrý rásimi barysynda osylaı málim etti.
«Almaty qalasynda ákim aýyz sýdy únemdeý máselesin oń sheshti. Shymkentte elektr energııasyn únemdeýge qatysty jaqsy tájirıbe bar. Aıtpaqshy, Almatyda esepteýish quraldar ornatylǵanda kommýnaldyq tólem 40 paıyzǵa tómendegen. Nege osyny jurtqa túsindirmeske? Basqa óńirlerde Almatydaǵy sýdy únemdeý nemese Shymkenttegi energııany únemdeý sekildi tájirıbeler qoldanyla ma? Bundaıdy óńirler bir-birinen úırenýleri kerek. Aldyńǵy qatarly oblystardyń ońtaıly tájirıbesi barlyq óńirler úshin jalylama erejege aınalýy shart», - dedi N. Nazarbaev.
Sonymen qatar, Memleket basshysy jalpylama alǵanda elimizde shıkizattyq resýrstardy óńdeý deńgeıin arttyrýǵa qol jetkizilgenin, energııany tıimdirek paıdalaný júzege asyp jatqanyn atap ótti. «Biz shıkizatty tereńirek óńdeýge, energııa paıdalanýdy tómendetýge jáne qosymsha qun salyǵy joǵarylatylǵan ónimder shyǵarýǵa qyzyǵýshylyq bildirgen ınvestorlarǵa basymdyq berýimiz kerek», - dedi Elbasy.
