Únemi tańǵy as ishý sýsamyr aýrýyna shaldyǵý qaýpin tómendetedi - ǵalymdar
ASTANA. QazAqparat - Mamandar tańerteń qabyldanatyn tamaqtyń qunarlylyǵyn 350 kalorııamen shekteýdi keńes beredi.
Mamandar tańǵy asty qabyldaýdyń aǵzanyń metabolızmi úshin rólin anyqtaýǵa baǵyttalǵan zertteýlerin júrgizdi. Ǵalymdardyń shyǵarǵan qorytyndylarymen tolyǵyraq The European Journal of Clinical Nutrition jýrnalynda tanysýǵa bolady.
Zertteýge artyq salmaǵy bar 35 áıel qatysqan. Olardyń bir bóligi kún saıyn tańǵy as ishse, qalǵan bóligi tańerteń múldem tamaqtanbaıtyn. Tájirıbe barysynda áıelder tańerteńgi ýaqytta aqýyzy kóp as ishken, keıinnen ǵalymdar olardyń qan quramyndaǵy glıýkoza deńgeıin kúni boıy ólshegen. Jumys nátıjeleri jobaǵa qatysqan tańerteń únemi tamaqtanǵan áıelderdiń qan quramyndaǵy glıýkozanyń deńgeıi jaqsy bolǵanyn kórsetti. Al tańǵy asty qabyldamaǵan áıelderde glıýkoza deńgeıi aıtarlyqtaı ósken.
Ǵalymdar zertteýdiń tańerteń únemi tamaqtanýdyń paıdaly ekenin kórsetkenin málimdeıdi. Aqýyzy mol tańǵy as qandaǵy qant deńgeıin tómendetip, ekinshi tıptegi sýsamyrdyń (dıabet) damýyna jol bermeıdi. Mamandar tańǵy astyń azyqtyq qunarlylyǵyn 350 kalorııamen shekteýge keńes beredi.
