Únemdelgen qarjy jańa joldar qurylysyna baǵyttalady - Senat otyrysy
ASTANA. QazAqparat - Parlament Senatynyń jalpy otyrysynda Qaryz týraly kelisimge №2 túzetýlerge qatysty Qazaqstan men HQQDB arasyndaǵy kelisim-hatty ratıfıkatsııalaý týraly zań jobasy qabyldandy.
Qujat únemdelgen qarjyny el aýmaǵynda joldardyń qurylysyna baǵyttaýdy kózdeıdi, dep habarlaıdy QazAqparat.
«1056 shaqyrym bolatyn Qyzylorda jáne Ońtústik Qazaqstan oblystaryndaǵy ýchaskelerdi qaıta salý úshin negizgi qaryz týraly kelisimge 2009 jyly 13 maýsymda qol qoıyldy. Qazirgi ýaqytta atalǵan ýchaskelerde qurylys jumystary aıaqtalyp, jol paıdalanýǵa berildi. Konkýrstyq rásimderdiń nátıjesi, sondaı-aq ulttyq valıýtanyń devalvatsııasynan keıin únemdelgen qarjy qaldy», - dep atap ótti QR Investıtsııalar jáne damý mınıstri Jeńis Qasymbek zań jobasy boıynsha baıandamasynda.
Onyń sózine qaraǵanda, Úkimet únemdelgen qarajat - 271,2 mln dollardy «Kúrti-Býrylbaıtal» (85 shaqyrym) jáne «Uzynaǵash -Otar» (96 shaqyrym) ýchaskelerin qaıta salýǵa jumsaýǵa sheshim qabyldady. Ol úshin 2017 jyly 26 qyrkúıekte Qazaqstan men Halyqaralyq qaıta qurý jáne damý banki arasyndaǵy kelisim-hatqa qol qoıyldy.
«Atalǵan qarajat uzyndyǵy 181 shaqyrymdyq asfaltbetondy tórt jolaqty joldyń qurylysyna jumsalmaq. Jobany júzege asyrý merzimi 2018-2020 jyldarǵa josparlanǵan», - dedi J. Qasymbek.
Aıta keteıik, kelisim-hatty ratıfıkatsııalaý «Nurly jol» ınfraqurylymdy damytýdyń 2015-2019 jyldarǵa arnalǵan memlekettik baǵdarlamasynda kózdelgen avtomobıl joldaryn salý boıynsha shyǵyndardy tıimdi basqarýǵa baǵyttalǵan.
