«Únemi jabyq»: ShQO halqynyń shaǵymynan soń joldaǵy ájethanalar máselesi sheshilmek

ÓSKEMEN. KAZINFORM – Shyǵys Qazaqstan oblysynda jańadan ashylǵan jol boıyndaǵy qoǵamdyq ájethanalar endi táýlik boıy ashyq turady. 

Jyl basynan beri «QazAvtoJol» AQ Shyǵys Qazaqstanda 4 sanıtarlyq-gıgıenalyq torap (Buqtyrma kópiriniń eki jaǵyna, Eginsý jáne Úlken Naryn aýyldaryna) ornatty. 

Dese de týrıster men turǵyndar bul qoǵamdyq ájethanalardyń jıi jabyq turatynyna shaǵymdandy. Osy máselege oraı oblystyq Týrızm basqarmasynyń basshysy Erjan Sembınov jaýap berdi.

– Halyq aryzynan keıin arnaıy tekserý júrgizilip, oblys basshylyǵy tarapynan aýdan ákimderine tıisti tapsyrmalar berildi. Endi jumysqa adam alynyp, ájethanalar táýlik boıy ashyq turýy tıis, - dedi ol. 

Erjan Sembınovtyń aıtýynsha, jol boıyna ornatylǵan 4 ájethana – tym az. 

– Jol boıyndaǵy servısti qamtamasyz etý úshin kem degende 25 sanıtarlyq-gıgıenalyq torap qajet. Osyǵan baılanysty biz Týrızm mınıstrligine qosymsha qarjylandyrý surap, resmı hat joldadyq, - dedi basqarma basshysy. 

Eske salsaq, osyǵan deıin Túrkistanda bir jasar bala daladaǵy ájethanaǵa túsip ketkeni habarlanǵan.