Undy dárýmendendirý jónindegi memlekettik baǵdarlamany iske asyrý qajet - Baýyrjan Baıserkın
ALMATY. Maýsymnyń 23-i. QazAqparat /Názıra Eleýhan/ - Qazaq taǵamtaný akademııasynyń málimeti boıynsha, Qazaqstanda 6,5 mıllıon adam anemııaǵa shaldyqqan, bul ana men balanyń ólim-jitim deńgeıiniń joǵary bolýynyń negizgi sebebi.
Bul máseleni sheshý úshin Halyqtyń densaýlyǵy men densaýlyq saqtaý júıesi týraly Qazaqstan Respýblıkasy Kodeksiniń 160-babyna sáıkes, temir jetispeýshilik anemııanyń aldyn-alý boıynsha, undy vıtamındendirý jónindegi memlekettik baǵdarlamany iske asyrý qajet. Bul týraly búgin Almatyda ótken arnaıy brıfıngte Respýblıkalyq sanıtarlyq-epıdemıologııalyq stansynyń bas dárigeri Baýyrjan Baıserkın aıtty, dep habarlaıdy QazAqparat.
Onyń aıtýynsha, undy dárýmender jáne mıneraldarmen baıytý - temir jetispeýshilik anemııany jeńýdegi asa tıimdi jáne az shyǵyndy tásildiń biri. "Ol eń aldymen, ananyń ólim-jitiminiń, nárestelerdiń týa bitken kemshilikter deńgeıin ádeýir tómendetedi, balalar men áıelder arasynda anemııanyń aldyn-alý jolymen balalardyń aqyl-oı damýyn jaqsartýǵa sebepshi bolady", deıdi ol.
Jıyn barysynda ol atalmysh baǵdarlamany iske asyrý aıasynda búgin Almatyda sanıtarlyq-epıdemıologııalyq qyzmet oryndary men standarttaý jáne metrologııa organdarynyń qyzmetkerlerine arnalǵan úsh kúndik baıytylǵan undy endirý, sapasy men qaýipsizdigin baqylaý jóninde semınar-keńes ashylǵandyǵyn aıtty. "Semınardyń uıymdastyrýshylary Qazaqstan Respýblıkasynyń Densaýlyq saqtaý mınıstrligi men Qazaqstandaǵy ıÝNISEF ókildigi. Onyń jumysyna AQSh, Kanada, Túrkııa men Kosovo elderiniń halyqaralyq sarapshylary qatysýda", dedi ol.
