Úndistannyń tanymal arheologııalyq jádigeriniń kóshirmesi Astanaǵa jetkizildi
ASTANA. KAZINFORM – QR Prezıdenti Іs basqarmasyna qarasty Prezıdenttik ortalyqta Úndistannyń Bıhar shtatynyń Bıhar mýzeıiniń jádigerlerinen kórme ashyldy.
«Adamzat, eskertkishter jáne tabıǵat týraly trıptıh» halyqaralyq kórmesi Qazaqstandaǵy Úndistan elshiligi Svamı Vıvekananda mádenı ortalyǵymen birlesip uıymdastyrylǵan.
Kórme taqyryptary bir-birimen sabaqtasyp, adamzatty, eskertkishter men tabıǵatty baılanystyratyn birtutas jeli qurady. Bıhar mýzeıiniń kýratory Mýmıta Goshtyń aıtýynsha, kóshpeli kórme týraly bastamany Qazaqstandaǵy Úndistan elshiligi kótergen.
«Bıhar mýzeıi – ejelgi Patna qalasynda ornalasqan Úndistannyń eń jas ári iri mýzeıleriniń biri. 2015 jyly ashylǵan mýzeı qorynda 40 myńnan astam jádiger bar. Mýzeı 10 sektsııadan quralady, ásirese arheologııa, tarıh, óner baǵyttarynda ejelgi zamannan qazirgi kúnge deıingi aralyqty qamtıtyn qundy jádigerleri bar. Ásirese búgingi kórmege Bıhar mýzeıiniń eń tanymal eksponaty – «ıAkshı Dıdargandj» músininiń kóshirmesi ákelindi. Bizdiń zamanymyzǵa deıingi 2,5 myń jyl burynǵy áıel músini arqyly sol zamandaǵy áıel sulýlyǵy, qoǵamnyń áıelge degen qurmetin kóre alamyz», - dedi M.Gosh agenttik tilshisine bergen suhbatynda.
Bul kórme Prezıdenttik ortalyqta bir aı turady, eger qyzyǵýshylyq joǵary bolsa, merzimi taǵy uzartylady. Ekspozıtsııada 39 sýretshi men 4 fotograftyń elýden astam óner týyndylary qazaqstandyq kelýshiler nazaryna usynylǵan.
Arpana Kaýrdyń «Kún men tún» týyndysy jaryq pen kóleńkeni, ómir men ólim týraly ekiudaılyqty shynaıy beıneleıdi.
Lalý Prasad Shoýdyń «Babý men Bıbı» týyndysy sýretshiniń daryny men bengal mádenıeti men estetıkasyna erekshe qumarlyǵyn kórsetedi. Orta taptaǵy bengal erleri men áıelderiniń stıldendirilgen beıneleri modernızmdi dástúrmen úılestiredi.
Randjıt Kýmardyń «Pavapýrı: djaınızmniń qasıetti mekeni», Bıdjoı Djaınniń «Bodhgaıa ǵıbadathanasynyń qasıetti sáýlesi» jáne Ganesh Hetrıvaldyń Patna qalasyndaǵy «Shrı Harmandır Sahıb» fotosýretterinde jaı ǵımarattar emes, tarıh tylsymyn, adamzattyń ǵasyrlar boıǵy estelikterin saqtaıtyn eskertkishter kórinis tapqan.
«Bul – Svamı Vıvekananda ortalyǵymen birlesip uıymdastyrylǵan ekinshi jobamyz. Búgin biz Úndistannyń eń iri mýzeıleriniń biri – Bıhar mýzeıiniń qoryndaǵy óner týyndylarymen tanysý múmkindigine ıe boldyq. Sýret polotnolary, músinder jáne fotografııalar avtorlardyń adam men tabıǵat arasyndaǵy ózara árekettestik týraly fılosofııalyq oılaryn kórsetedi. Mádenı artefaktiler bizdi ejelgi órkenıet atmosferasyna jeteleıdi, adamzattyń álemdegi orny men róli, sondaı-aq onyń qorshaǵan ortaǵa áseri týraly oılanyp kórýge múmkindik beredi. «Adamzat, eskertkishter jáne tabıǵat týraly trıptıh» kórmesi úndi halqynyń dástúri men mádenıeti arqyly shyǵys áleminiń tańǵajaıyp jumbaq álemine jaqyndaýǵa múmkindik beretinine senimdimin», - dedi Prezıdenttik ortalyq dırektory Baqytjan Temirbolat kórmeniń ashylý saltanatynda.
Sondaı-aq, QR Prezıdenttik ortalyǵy men Bıhar mýzeıi (Úndistan, Patna qalasy) arasyndaǵy yntymaqtastyq pen ózara is-qımyl týraly memorandýmǵa qol qoıyldy. Qylqalam óneri boıynsha ekijaqty baılanystardy jaqsartýǵa múmkindikter týǵyzady.
«Bul kórme adam rýhynyń, mádenı muranyń jáne tabıǵattyń tereń baılanysyn kórsetedi. Búgingi jádigerler – ónerdiń tarıhty saqtaýdaǵy kúshiniń dáleli ǵana emes, adamzattyń tabıǵat pen eskertkishterge degen qurmeti turaqty úılesimdik úshin sheshýshi mánge ıe bolatyn bolashaqtyń kórinisi. Prezıdenttik ortalyqta Úndistannyń óner týyndylary alǵash ret kórsetilip otyr. Bul rette men Bıhar mýzeıiniń tutas ujymyn beıneleý ónerindegi sheberlikterin álemdik arenaǵa shyǵarǵanyn erekshe atap ótemin. Búgin bekitilgen memorandým mádenı yntymaqtastyǵymyzdy odan ári nyǵaıtady jáne bolashaq jobalarǵa shabyttandyrady», - dedi Úndistannyń tótenshe jáne ókiletti Elshisi Nagendra Prasad.
