Úndistannyń soltústiginde sý tasqyny men kóshkinnen keminde 17 adam mert boldy
ASTANA. KAZINFORM – Úndistannyń soltústigindegi Ýttarakhand shtatyndaǵy taýly Dehradýn aýdanynda mýsson jaýyny men kóshkin saldarynan keminde 17 adam mert bolyp, 20 adam iz-túzsiz ketti, dep habarlaıdy reseılik TASS.
The New Indian Express basylymynyń jazýynsha, tabıǵattyń dúleı kúshinen Dehradýndaǵy kólik ınfraqurylymy búlinip, úıler men qonaqúıler qırady. Tasqyn sý Rıspana men Bındal ózenderindegi kópirlerdi qulatyp ketti. Óz kezeginde ol tabıǵı apattan zardap shekken halyqqa kómek kórsetýda qıyndyqtar týdyrdy. Óńirde mektepter ýaqytsha jabylyp, memlekettik mekemelerdiń jumysy toqtatyldy.
Ýttarakhand shtatynyń bas mınıstri Pýshkar Sıngh Dhamı Dehradýn aýdanyna qutqarý jumystary men jergilikti turǵyndarǵa kómek kórsetý úshin tabıǵı apattardyń saldarymen kúresetin kúshterdi jiberdi.
Osyǵan deıin Balıde sý tasqynyna baılanysty tótenshe jaǵdaı jarııalanǵany týraly jazdyq.