Úndistannyń shyǵysynda naızaǵaı soǵýynan 33 adam qaza tapty
ASTANA. KAZINFORM — Úndistannyń shyǵysyndaǵy mýsson jaýyny kezinde naızaǵaıdan kem degende 33 adam qaza taýyp, ondaǵan adam jaraqat aldy, dep habarlaıdy arabnews.
Tótenshe jaǵdaılardy basqarý departamentiniń málimdemesinde Bıhar aımaǵynda sársenbi jáne beısenbi kúnderi bolǵan qatty jańbyr saldarynan adamdardyń qaza tapqany aıtyldy. Qaıǵyly oqıǵanyń qurbandary sharýalar men dala jumysshylary boldy.
Keı jerlerde nóser jańbyr men naızaǵaı tolastaǵan joq.
Aımaqtyq apattardy basqarý mınıstri Vıdjaı Kýmar Mandal jaýapty sheneýnikterge tótenshe jaǵdaı týraly eskertý jasap, qajetti saqtyq sharalaryn qabyldaýǵa nusqaý berilgenin aıtty.
Úkimet naızaǵaı soǵýynan qaza tapqandardyń otbasylaryna 4 mıllıon rýpıı (4600 dollar) kóleminde ótemaqy tóleıtinin jarııalady.
Eske sala keteıik, Pákistandaǵy mýsson jaýyny saldarynan qaza bolǵandar sany 111 adamǵa jetkeni jaıly jazǵan edik.