Úndistannyń iri áýe kompanııasy Almatyǵa reısterin toqtatty

ALMATY. KAZINFORM – Úndistannyń IndiGo áýe kompanııasy birneshe halyqaralyq reısti, sonyń ishinde Almatyǵa ushatyn baǵyttardy ýaqytsha toqtatty.

Áýe kompanııasy bul sheshimdi Iranǵa jaqyn óńirdegi áýe keńistigine qatysty qaýipsizdik jaǵdaıyn eskere otyryp qabyldaǵan. Áýe tasymaldaýshy aımaqtaǵy jaǵdaıdyń damýyn jiti baqylap otyrǵanyn jáne qaýipsizdik eń basty basymdyq ekenin málimdedi. 

26, 27 jáne 28 qańtarǵa Delıden Almatyǵa, Tbılısıge, Tashkentke jáne Bakýge josparlanǵan reıster toqtatyldy. 

Sondaı-aq atalǵan qalalardan keri reıster de oryndalmaıdy. 

IndiGo ókilderiniń habarlaýynsha, qazirgi jaǵdaıǵa baılanysty keıbir reısterdiń ushý ýaqyty uzarýy nemese qosymsha toqtatylýy múmkin. 

Jolaýshylarǵa balama reısterdi tańdaý nemese bılet qunyn tolyq qaıtarý múmkindigi usynylǵan. Kompanııa jolaýshylarǵa reıs mártebesin turaqty túrde tekserip otyrýdy usyndy.

Eske salaıyq, buǵan deıin Air Astana Iran áýe keńistiginiń jabylýyna baılanysty keıbir turaqty jáne charterlik reısteriniń marshrýttaryn ózgertkenin habarlaǵan edi.