Úndistannyń Ortalyq banki negizgi mólsherlemeni 6,5% deńgeıinde qaldyrdy

Úndistannyń ortalyq banki ınflıatsııalyq táýekelderdi baqylaýda ustaı otyryp, qatań aqsha-nesıe saıasatyn jalǵastyratynyn eskertti. Sonymen qatar juma kúni negizgi paıyzdyq mólsherlemeni ózgerissiz qaldyrdy. Kazinform bul týraly Reuters agenttigine silteme jasap habarlaıdy. 

Repo mólsherlemesi 6,5% deńgeıinde biraýyzdan qabyldandy. Úndistannyń rezervtik banki (RBI) shilde-qyrkúıek aralyǵynda ósimniń boljamnan artyq bolýyna baılanysty ekonomıka osy jyly 7% ósedi dep otyr.

«Ósim turaqty jáne kúshti bolyp qala beredi, bul barlyǵyn tańǵaldyrady», - deıdi Úndistan Ortalyq bankiniń basshysy Shaktıkanta Das.

Degenmen ortalyq bank ókilderi ınflıatsııa boljamy belgisiz bolyp qala beretinin aıtady.

«Qazirgi boljam azyq-túlik ınflıatsııasyna baılanysty táýekelder kóleńkesinde tur», - dedi Úndistannyń ortalyq bankiniń basshysy.

Úndistannyń Ortalyq banki ınflıatsııanyń ósýin tejeý ​​maqsatynda 2022 jyldyń mamyr aıynan bastap repo mólsherlemesin 250 bazıstik tarmaqqa kóterdi.