Úndistandaǵy safarı-parkte pil týrıst áıeldi taptap óltirdi
ASTANA. KAZINFORM — Úndistannyń Karnataka shtatynda safarı-parkte pil týrıst áıeldi taptap óltirdi, dep habarlaıdy BelTA.
— 33 jastaǵy týrıst Tamılnad shtatynan kelgen. Karnataka shtatyndaǵy Kodagý aýdanyndaǵy Dýbare atty jabaıy tabıǵat parkinde eki pildiń arasyndaǵy tóbeles kezinde bireýi áıeldiń ústine qulap, ol sol jer kóz jumdy, — dep jazady Indian Express basylym.
Áıel saıabaqqa kúıeýi jáne balasymen birge kelgen.
Oqıǵa tańǵy ýaqytta boldy, sol kezde týrısterge pilderdiń tamaq ishý, jýyný sekildi tirshiligin jaqynnan kórýge ruqsat etilgen.
Jergilikti sheneýnikterdiń málimetinshe, sol ýaqytta Kanchan men Martanda atty eki pil tóbelesken. Park qyzmetkerleriniń tynyshtandyrǵanyna qaramastan, Kanchan Martandaǵa shabýyl jasap, ol tepe-teńdigin joǵaltyp, jerge qulaǵan.
Sol kezde Týlası basqa týrıstermen birge janýarlardyń janynan qasha bastady, biraq súrinip ketip, sol sátte pil onyń ústine qulaǵan. Áıeldiń kúıeýi men balasy aman qaldy jáne basqa zardap shekkender joq.
Karnataka shtatyndaǵy Orman sharýashylyǵy, ekologııa jáne qorshaǵan ortany qorǵaý mınıstri Eshvar Khandre bolǵan jaǵdaıdy muqııat tekserip, bolashaqta mundaı oqıǵalardyń aldyn alý úshin barlyq sharalardy qabyldaýdy tapsyrdy. Ol pilderdiń qanshalyqty qolǵa úıretilgenine qaramastan, olardyń ár sáttegi minez-qulqyn boljaý óte qıyn ekenin atap ótti.
Khandre sheneýnikterge týrısterdiń pilderdiń murnyn ustaýǵa, olarǵa jaqyndap sýretke túsýge nemese qant, banan sııaqty taǵamdar berýge tyıym salýdy da tapsyrdy.
Buǵan deıin Germanııadaǵy haıýanattar baǵynda 55 jasar pil búıirimen qulap, qutqarý operatsııasy dramaǵa toly bolǵanyn jazǵan bolatynbyz.
