Úndistannyń bilim mınıstri emtıhan tapsyrmalarynyń taralýyna baılanysty qyzmetinen ketti
ASTANA. KAZINFORM — Úndistannyń bilim mınıstri Dharmendra Pradhan medıtsınalyq joǵary oqý oryndaryna túsý emtıhanynyń tapsyrmalary syrtqa shyǵyp ketkeni týraly aıyptaýlardan keıin bastalǵan jappaı narazylyqtar aıasynda qyzmetinen ketti, dep habarlaıdy Anadoly.
Hindustan Times basylymynyń jazýynsha, Pradhan amerıkalyq X áleýmettik jelisinde málimdeme jarııalap, emtıhan barysynda zańbuzýshylyqtar anyqtalǵanyn jáne bul jaǵdaı úshin jaýapkershilikti basynan-aq óz moınyna alǵanyn aıtty.
Sonymen qatar mınıstr emtıhan nátıjelerin jalpy alǵanda qanaǵattanarlyq dep baǵalady.
— Alaıda osy úderis kezinde jaýapty qyzmettegi keıbir adamdar kedergi keltirip, kóptegen stýdentti jańylystyrýǵa tyrysty. Bul meni qatty qynjyltty, — dedi ol.
Al narazylyq sherýleriniń aldyńǵy qatarynda júrgen «Halyqtyq taraqandar partııasy» qozǵalysy áleýmettik jelide: «Stýdentterdiń kúshi jasasyn!» degen jazba jarııalady.
Buǵan deıin Úndistannyń premer-mınıstri Narendra Modı emtıhan tapsyrmalarynyń taralýyna qatysy bar adamdardy tez arada anyqtap, olarǵa qatań jaza qoldanýdy tapsyrǵan bolatyn.
Narazylyq sherýleri barysynda Nıý-Delıde qaýipsizdik maqsatynda metronyń 16 stantsııasy ýaqytsha jabyldy.
Mýmbaı qalasynda shamamen 1,5 myń adam bilim mınıstriniń otstavkasyn talap etip mıtıng ótkizdi. Polıtsııa 200-ge jýyq narazylyq qatysýshysynyń ustalǵanyn habarlady.
Tergeý aıasynda medıtsınalyq joǵary oqý oryndaryna arnalǵan ulttyq qabyldaý emtıhanynyń tapsyrmalarynyń taralýyna qatysy bar degen kúdikpen 13 adam ustaldy.
«Halyqtyq taraqandar partııasy» degen ne?
Bul qozǵalys mamyr aıynda negizinen Z býynynyń ınternet qoldanýshylarynyń bastamasymen qurylǵan. Ol Úndistan Joǵarǵy sotynyń tóraǵasy Sýrıa Kanttyń memlekettik júıege «parazıtterdiń shabýyly» týraly aıtyp, jumys taba almaǵan keıbir jastardy «taraqandarǵa» teńegen sózinen keıin keńinen tanyldy.
Áýelde ıronııalyq ınternet-bastama retinde paıda bolǵan qozǵalys keıin jastardyń kóńil kúıin bildiretin qoǵamdyq kúshke aınalyp, emtıhan tapsyrmalarynyń taralýyna baılanysty ulttyq qabyldaý emtıhanyn ótkizýdi toqtatýdy talap etken narazylyqtarǵa belsendi qatysty.
Narazylyq bildirýshiler úkimetti emtıhan ótkizý júıesindegi kemshilikterdi joıa almady jáne narazylyq qozǵalysyn basýǵa tyrysty dep aıyptap otyr.
Aıta ketelik Úndistandaǵy Assam shtatynda sý tasqynynan qaza bolǵandar sany 47 adamǵa jetken edi.
