Úndistannan Qazaqstanǵa baǵyt alǵan alǵashqy júk poıyzy jolǵa shyqty
TAShKENT. KAZINFORM — Úndistan men Qazaqstandy baılanystyratyn alǵashqy júk poıyzy jolǵa shyqty, dep habarlaıdy Kazinform agenttiginiń menshikti tilshisi.
«Ўzbekıston temır ıўlları» kompanııasynan málim etkendeı, atalǵan marshrýt boıynsha poıyz qatynasyn jolǵa qoıýǵa ózbek tarapy qoldaý kórsetip otyr.
— Kólik dálizderin keńeıtý jáne halyqaralyq júk tasymalyn damytý maqsatynda «Ўztemırıўlkonteıner», «TLTsT» ı «Kedentransservıs» kompanııalarynyń qoldaýymen poıyz qatynasy jolǵa qoıyldy, — delingen ózbekstandyq kompanııa taratqan habarlamada.
12 konteıner tıelgen quram Úndistannyń «Mýndra» portynan shyǵyp, Qazaqstandaǵy «Sorokovaıa» stantsııasyna barady. Josparǵa saı, poıyz Iran, Túrikmenstan jáne Ózbekstan aýmaǵy arqyly ótedi. Ol teńiz jolymen — 1,5 myń, temirjol jelisimen 4 myń shaqyrymdy eńseredi.
Aıta keteıik, osyǵan deıin bul baǵyt boıynsha Úndistannan Ózbekstanǵa júk tasymaldanǵan edi.
«Ўzbekıston temır ıўlları» kompanııasynyń málimetinshe, júk tasymaly úshin «Úndistan — Ortalyq Azııa» dálizin turaqty negizde qoldaný josparlanyp otyr.
Eske salaıyq, buǵan deıin Qazaqstan men Ózbekstan arasynda qosymsha 4 saýda dálizi ashylýy múmkin ekenin jazyp edik.
Munymen birge, Qazaqstan men Ózbekstandy baılanystyratyn jańa temirjol jelisi salynyp jatyr. Ol 2027 jyly paıdalanýǵa berilmek.