Úndistanǵa qarasty Djammý men Kashmır shtatynda 48 týrıstik nysan jabyldy
ASTANA. KAZINFORM — Djammý men Kashmır shtatynda 22 sáýirde oryn alǵan terrorıstik shabýyldan keıin bılik 48 týrıstik nysandy jabý týraly sheshim qabyldady, dep jazdy Anadoly agenttigi.
Aımaq bıligi qaýipsizdik maqsatynda týrıstik nysandardyń jabylatynyn habarlady.
NDTV telearnasynyń habarlaýynsha, tabıǵaty ásem Pahalgam aýdanynda bolǵan teraktiden keıin qaýipsizdik sharalary kúsheıtilgen.
Bılik qaýipsizdik maqsatynda aımaqtaǵy 48 týrıstik nysannyń jabylatynyn málimdedi.
Atalǵan kórikti jerlerdiń qansha ýaqytqa jabylatyny týraly naqty aqparat joq.
Keıbir jergilikti turǵyndar týrızm – óńirdegi negizgi tabys kózi bolǵandyqtan, bul oqıǵa salanyń aýyr soqqy alýyna ákelýi múmkin ekenin aıtyp, alańdaýshylyq bildirgen.
Pahalgamdaǵy terrorıstik shabýyl
22 sáýir kúni Úndistannyń Djammý men Kashmır shtatyndaǵy Pahalgam aýdanynda qarýly adamdar týrısterge oq jaýdyryp, sonyń saldarynan 26 adam qaza tapty. Sonymen qatar, kóptegen adam jaraqat alǵan.
Osy oqıǵadan keıin Úndistan premer-mınıstri Narendra Modı Saýd Arabııasyndaǵy resmı saparyn toqtatyp, Nıý-Delıge oraldy. Astanaǵa kelgen soń Modı qaýipsizdik jaǵdaıyn baǵalaý maqsatynda joǵary laýazymdy tulǵalarmen jıyn ótkizdi.
Úndistan bıligi shabýyldy Pákistannan kelgen adamdar uıymdastyrdy dep málimdedi. Osyǵan baılanysty Úndistan «Ind ózeni týraly kelisimniń» kúshin toqtatyp, Nıý-Delıde jumys istep jatqan pákistandyq keńesshilerge elden bir apta ishinde ketýdi buıyrdy, sondaı-aq Pákistan azamattaryna berilgen vızalardy joıdy.
Óz kezeginde Pákistan bul aıyptaýlardy joqqa shyǵaryp, Islamabadtaǵy Úndistan dıplomatııalyq mıssııasynyń qyzmetkerler sanyn qysqartty.
Pákistan bıligi Ind ózeni alabyndaǵy ózenderdiń aǵysyn toqtatý nemese ózgertýge baǵyttalǵan kez kelgen úndilik áreketti soǵys aktisi retinde qabyldaıtynyn málimdedi. Sonymen qatar, el Úndistanmen barlyq saýdany toqtatyp, áýe keńistigin japty.
Sondaı-aq Pákistan úkimeti Úndistan azamattaryna berilgen barlyq vızalardyń kúshin joıǵanyn jarııalady.
Buǵan deıin habarlanǵandaı, Úndistan polıtsııasy Kashmırdegi shabýylǵa kúdiktini anyqtady.