Úndistandyq jastar eldiń bilim mınıstriniń otstavkaǵa ketýin talap etti
ASTANA. KAZINFORM — Nıý-Delı qalasynyń ortalyǵynda «Cockroach Janta Party» («Taraqan halyq partııasy») atty jastar qozǵalysynyń músheleri lager quryp, polıtsııanyń talaptaryna qaramastan ketýden bas tartty. Jastar Úndistannyń bilim mınıstri Dharmendra Pradhannyń otstavkaǵa ketýin talap etip otyr, dep habarlaıdy Al Jazeera.
Qozǵalysty jaqynda Boston ýnıversıtetin támamdap, elge oralǵan 24 jastaǵy Abhıdjıt Dıpke basqarady. Ol áleýmettik jelidegi narazylyqty kóshege shyǵyp tanytý qajet dep sheshim qabyldaǵan. Jastardy biriktirýge sebep bolǵan negizgi másele — emtıhan tapsyrmalarynyń jelide tarap ketýi jáne qabyldaý emtıhandaryn ótkizý kezindegi zańbuzýshylyqtar.
Qozǵalystyń tarıhy kútpegen jerden bastalǵan. Úndistan Joǵarǵy sotynyń tóraǵasy bir pikirtalasta jastardy taraqandarmen salystyrǵan.
— Eger barlyq taraqan birigip ketse she? — dep Dıpke X jelisinde jaýap jazǵan.
Osy jazba birden vırýsqa aınaldy. Búginde qozǵalystyń Instagram paraqshasynda 22 mıllıonnan astam jazylýshy bar — bul eldegi bıleýshi partııadan eki ese kóp.
Shamamen 1,4 mlrd halqy bar Úndistannyń jartysyna jýyǵy 25 jastan kishi. Sońǵy aılarda elde emtıhan tapsyrmalarynyń taralýy men qabyldaý emtıhandaryndaǵy buzýshylyqtarǵa qatysty birneshe janjal qoǵamda úlken rezonans týdyrdy.
Nıý-Delıdegi alǵashqy aktsııadan keıin (6 maýsym) narazylyqtar Mýmbaı, Bangalor jáne Nagpýr qalalaryna tarady.
Qozǵalystyń qatysýshylarynyń biri — 18 jastaǵy Sachın Kýmar. Ol bir jyl boıy eldegi basty medıtsınalyq emtıhanǵa daıyndalǵan, biraq tapsyrmalar taralyp ketkeni anyqtalǵannan keıin nátıjeleri joıylǵan.
— Bul meni kúıretti. Stýdentter depressııaǵa túsedi, biraq eshkim mán bermeıdi, — deıdi ol.
Kýmar oqýyn jalǵastyrmaǵan, al ótken demalys kúnderi shamamen 1,7 mln talapker qaıta emtıhan tapsyrǵan kezde ol lagerde qalýdy tańdaǵan.
Jaǵdaıdy ýshyqtyrǵan taǵy bir faktor — alǵashqy emtıhan men qaıta tapsyrý aralyǵynda onnan astam stýdenttiń óz-ózine qol jumsaǵany týraly habarlar. Bılik Telegram messendjeriniń jumysyn ýaqytsha shektegen, sebebi emtıhan materıaldary sol arqyly taratylǵan bolýy múmkin, biraq synshylar bul sharany jetkiliksiz dep esepteıdi.
Delı polıtsııasy narazylardy lagerden shyǵarýǵa tyrysyp jatyr. Qatysýshylardyń aıtýynsha, olardyń sý men azyq-túlikke qol jetkizýine shekteý qoıylyp otyr. Alaıda lagerdegiler beriler emes.
Osyǵan deıin Nıý-Iork shtatyndaǵy myńdaǵan Long-Aılend temirjol jumysshylary resmı túrde ereýil jarııalap, Amerıkanyń eń qarbalas temirjolyndaǵy qozǵalysty toqtatty.
