Úndistandyq mıllıarder AQSh-ta alaıaqtyq pen para aldy dep aıyptaldy

ASTANA. KAZINFORM – Nıý-Iorkte aımaq prokýrory úndilik mıllıarder Gaýtam Adanıge úndi sheneýnikterine mıllıondaǵan dollar para berý isi boıynsha resmı aıyp taqty, dep habarlaıdy VVS. 

Reuters agenttiginiń sot qujattaryna silteme jasap habarlaýynsha, sýdıa Gaýtam Adanı men onyń jıeni Sagar Adanıdi tutqyndaýǵa order berdi, al prokýrorlar olardy AQSh-tan tys jerde qamaýǵa alýǵa nıetti. 

Amerıka prokýratýrasy bul isti amerıkalyq sot qaraýy tıis dep sanaıdy, óıtkeni tergeýge sáıkes Gaýtam Adanı men onyń qyzmetkerleri úndi sheneýnikterine «jasyl» energetıkamen aınalysatyn óziniń kompanııasy tıimdi kelisimshart jasaý úshin 250 mln dollar para bergen, sondaı-aq atalǵan kompanııa úsh mıllıard dollar kólemindegi ınvestıtsııany  olar amerıkalyq ınvestorlardan jınaǵan. 

Kompanııa 20 jyl ishinde eki mıllıard dollarǵa deıin tabys ákelip otyrýǵa ýáde bergen.  

AQSh-tyń Nıý-Iork shyǵys okrýginiń prokýrory Brıon Pıstiń pikirinshe, Adanı men onyń qyzmetkerleri amerıkalyq ınvestorlardy sybaılas jemqorlyqqa qatysymyz joq dep aldap soqqan. Olarǵa qarsy taǵylǵan alaıaqtyq aıyptyń máni osynda.

«Aıyptalýshylar Úndistan úkimetiniń sheneýnikterine para berip, mıllıardtaǵan dollar quny bar kelisimshartqa qol jetkizý úshin kúrdeli shema jasaǵan […] sondaı-aq amerıkalyq jáne sheteldik ınvestorlardan kapıtal jınaý atalǵan shemany qoldana otyryp, ótirik aıtty», - dedi prokýror Pıs aıyptaý qorytyndysyn jarııalaý kezinde.

62 jastaǵy Gaýtam Adanıdiń dáýleti shamamen 70 mlrd dollarǵa baǵalanyp otyr. Adanı premer-mınıstr Narendra Modımen jáne onyń úkimetimen tyǵyz baılanysta, al oppozıtsııa olardy bul baılanystyń arqasynda Adanı kompanııalarynyń kóptegen tıimdi kelisimshart alǵany úshin aıyptap otyr.

Adani Group kontserni bul aıyptaýlarǵa qatysty ázirge túsinikteme bergen joq.

Kontsernniń AQSh-taǵy qıyndyqtary 2023 jyldyń qańtarynda Hindenburg Research analıtıkalyq kompanııasy ony baǵaly qaǵazdardy shyǵarý kezinde alaıaqtyq jasady dep aıyptaǵan kezde bastaldy. 

Prokýratýra kontsern qyzmetin tekserýdi 2022 jyly bastaǵanyna sendirip otyr. 

AQSh-ta aımaq prokýrorlaryn prezıdent taǵaıyndaıdy, al prokýror Brıon Pısti 2021 jyly prezıdent Djo Baıden taǵaıyndady. 

Gaýtam Adanı áleýmettik jelide Donald Trampty saılanýymen quttyqtap, AQSh-qa 10 mlrd dollar ınvestıtsııalaýǵa ýáde berdi.