Úndistandyq áıel múgedek kúıeýin arqalap, jaıaý 150 shaqyrym joldy eńserdi

ASTANA. KAZINFORM — Úndistanda eki jas balasyn ertip alǵan Asha esimdi áıel kúıeýi Sachındi arqalap, Harıdvar qalasynan Madınagarǵa jaıaý bardy, dep habarlaıdy Times Now. 

Eldegi Shıva tabynýshylaryna arnalǵan jyl saıynǵy zııarat bolyp tabylatyn Kanvar ıAtra rásiminde ol qasıetti Ganga ózeninen sý ákelý úshin kúıeýin arqalap aldy. Onyń jubaıy Sachın byltyr omyrtqasyna ota jasalǵan soń belinen tómengi jaǵy sal bolyp, júre almaı qalǵan. Ol bul dinı merekege 13 jyl boıy ózi qatysqan. Biraq bıyl sal aýrýyna shaldyqqan ol áıeliniń kómegimen qatysýǵa múmkindik aldy.

Asha muny kúıeýiniń aıaǵynan turyp, tolyq saýyǵyp ketýi úshin ǵana jasap jatqanyn aıtty. Áıel osy áreketinen keıin Internette úlken tanymaldylyqqa ıe boldy. Áleýmettik jeli qoldanýshylary onyń bul áreketin erekshe mahabbat pen adaldyqtyń sımvoly retinde baǵalady.

Kanvar ıAtra 1980-jyldardyń aıaǵyna deıin birneshe áýlıeler men qart tabynýshylardyń shaǵyn rásimi retinde ótkizilip, keıin tanymal bola bastaǵan. Búginde Úndistandaǵy eń iri jyl saıynǵy dinı is-sharaǵa aınaldy. 2023 — 2024 jyldardaǵy zııaratqa 30 mıllıonǵa jýyq dindarlar qatysty.

Eske sala keteıik, álemdegi eń qart marafonshy Úndistanda jol apatynan qaza tapty.