Úndistandyq Adıtıa Mıttal Pavlodardaǵy shahmat týrnırinde jeńiske jetti

Osymen 23-shi ret ótkizilgen Pavlodar Open halyqaralyq týrnıri aıaqtaldy. Qazaqstan shahmat federatsııasynyń vıtse-prezıdenti Aleksandr Babenko men týrnırdiń bas tóreshisi Pavel Kotsýr zııatkerlik saıystyń qalaı ótkeni týraly baıandap berdi. Kazinform bul týraly Pavlodar.rsk Іnstagram paraqshasyna silteme jasap habarlaıdy. 

Baspasóz máslıhatynda aıtylǵandaı, shahmattan Pavlodar oblysynyń birinshi ashyq birinshiligi 49 qatysýshynyń basyn qosqan, onyń ishinde 48 qazaqstandyq sportshy bar. Týrnırge 5 qurlyqtan 230 ókil qatysty.

«Bul dodaǵa 63 halyqaralyq ataq ıegeri, 84 sheteldik jáne 21 eldiń rezıdenti qatysty. Jarys aıasynda Qazaqstan kýbogynyń besinshi kezeńi ótti. Munda Qazaqstannyń erler quramasy tolyqtaı derlik óner kórsetse, qyzdar jastar quramasy tolyq quramda oınaǵan joq. Eń bastysy, bizdiń quramalarymyz ben jas sportshylar óz qurlyǵynyń eń myqty shahmatshylarymen oıynda kúsh synaı aldy. Pavlodar ashyq chempıonaty shveıtsarııalyq júıe boıynsha on kún boıy ótti. Úndistandyq grossmeıster, 17 jastaǵy Adıtıa Mıttal jeńimpaz atandy. Magnýs Karlsendi jeńgennen keıin BAQ-ta tanymal bolǵan Álisher Súleımenov jalpy esepte toǵyzynshy orynǵa turaqtady. Taǵy bir pavlodarlyq grossmeıster Denıs Mahnev altynshy boldy. Jalpy, qazaqstandyq shahmatshylardyń Pavlodardaǵy oıyndaǵy nátıjeleri bizdi qýantty», - dedi A.Babenko.