Úndistandaǵy jármeńkede «Tsýnamı» attraktsıony qulap, bir adam mert boldy

ASTANA. KAZINFORM — Harıana shtatynyń Sýradjkýnd qalasyndaǵy jármeńkede attraktsıon qulap, bir polıtsııa qyzmetkeri qaza tapty. Taǵy 13 adam jaralandy, dep habarlaıdy NDTV arnasy.

Oqıǵa senbi kúni keshke Farıdabad jármeńkesinde «Tsýnamı» dep atalatyn alyp átkenshek qısaıyp, joǵarydan qulaǵan.

Polıtsııanyń málimetinshe, oqıǵa kezinde temir átkenshekte shamamen 15 adam bolǵan.

Zardap shekkenderdiń arasynda Palval polıtsııa bólimindegi kezekshi ınspektor da bar. Ol dereý aýrýhanaǵa jetkizildi, biraq dárigerler onyń qaıtys bolǵany týraly habarlady. Ajal qushqan polıtsııa qyzmetkeri bıyl naýryz aıynda zeınetkerlikke shyǵýy tıis edi.

Oqıǵadan keıin jármeńke alańyndaǵy halyq tez arada evakýatsııalandy. Zardap shekkenderdiń barlyǵy aýrýhanalarǵa jetkizildi. Qazir oqıǵaǵa qatysty tergeý bastaldy.

Sýradjkýndtaǵy jármeńke 31 qańtarda bastalǵan jáne 15 aqpanǵa deıin jalǵasady dep josparlanǵan.

Aıta keteıik, Saýd Arabııasynyń Et-Taıf qalasyna jaqyn ornalasqan Hada aýdanyndaǵy Green Mountain Park oıyn-saýyq saıabaǵynda «360 gradýs» attraktsıony synyp ketip, 23 adam jaraqat aldy.

Qazaqstanda jyl saıyn átkenshek pen batýt maýsymy qaýipsizdik týraly eskertýmen bastalady. Biraq qaıǵyly oqıǵalar azaıar emes. Elimizde attraktsıondardy tekseretin synaq ortalyqtarynyń bar-joǵy týraly myna siltemeden oqı alasyz.