Úndistandaǵy zaýytta ammıak tarap, 7 adam qaza tapty
ASTANA. KAZINFORM — Úndistannyń Tamılnad shtatynda teńiz ónimderin óńdeıtin kásiporynda ammıaktyń taralýynan keminde 7 adam qaza taýyp, 40-tan astam adam zardap shekti. Bul týraly BELTA habarlady.
Málimetke sáıkes, oqıǵa teńiz ónimderin óńdeıtin zaýyttardyń birinde bolǵan. Apat kezinde kásiporynda shamamen 120 qyzmetker bolǵan.
Ýly ammıaktyń taralýy saldarynan birneshe jumysshy kóz jumdy. Ondaǵan adam ýlanyp, tynys alý qıyndaýyna baılanysty shuǵyl túrde aýrýhanaǵa jetkizildi.
Zardap shekkenderge medıtsınalyq kómek kórsetilip jatyr.
Oqıǵa ornynda qutqarý jumystary júrip jatyr. Qazir apattyń mán-jaıy men ammıaktyń taralý sebepteri tekserilip jatyr.
Jergilikti bılik oqıǵaǵa baılanysty tergeý bastady.
Osyǵan deıin Úndistanda áskerı ushaq apatqa ushyrap, bes adam qaza tapqany týraly jazdyq.
