Úndistandaǵy ushaq apaty: 11A ornynda otyrǵan bir jolaýshy tiri qalǵan
NЬıÝ-DELI. KAZINFORM — Úndistannyń Ahmedabad qalasyndaǵy ushaq apatynda 11A ornynda otyrǵan bir adam tiri qalǵanyn bas polıtseı habarlady, dep jazdy Timesofindia saıty.
— Polıtsııa tiri qalǵan adamdy tapty. Qazir ol aýrýhanada em qabyldap jatyr. Qansha adamnyń qaza tapqany týraly naqty aıtý múmkin emes. Óıtkeni ushaq turǵyn úı aýmaǵyna qulaǵandyqtan, qurbandar sany áli de artýy múmkin, — dep habarlady Ahmedabad qalasynyń polıtsııa komıssary G. S. Malık ANI jańalyqtar agenttigine bergen málimdemesinde.
Ushaq bortynda 230 jolaýshy men 12 ekıpaj múshesi — barlyǵy 242 adam bolǵan. Ushaq Meghanı aýdanynda qulap, janarmaı mólsheriniń kóptigine baılanysty joıqyn órt shyqty.
Qutqarý jumystaryna alty NDRF (Ulttyq apattyq áreket etý kúshi) toby, órt sóndirý kólikteri, jedel járdem jáne polıtsııa bólimsheleri jumyldyryldy.
Ushaqpen baılanys úziler aldynda MAYDAY (dabyl sıgnaly) berilgen.
Osy ýaqytta Úndistan Premer-mınıstri Narendra Modı Ahmedabadtaǵy ushaq apatyna baılanysty kóńil aıtty. Ol bul oqıǵany «sózben aıtyp jetkizý múmkin emes qaıǵyly jaǵdaı» dep atady.
— Ahmedabadtaǵy qaıǵyly oqıǵa bárimizdi eseńgiretip, júregimizge qaıaý saldy. Muny sózben aıtyp jetkizý múmkin emes aýyr tragedııa. Qazir mınıstrlermen jáne tıisti organdarmen baılanystamyn, olar zardap shekkenderge kómek kórsetý úshin jumys istep jatyr, — dep jazdy premer-mınıstr Modı X jelisindegi jazbasynda.
Timesofindia saıty Air India ushaǵynyń apatqa ushyrýyna baılanysty, Ulybrıtanııa Koroli ІІІ Charlz Ahmedabadtaǵy ushaq apatyna baılanysty kóńil aıtqanyn jazdy.
Ulybrıtanııa Koroli ІІІ Charlz jáne onyń jubaıy, Koroleva Kamılla, «búgin tańerteń Ahmedabadta bolǵan qaıǵyly oqıǵaǵa qatty eseńgirep, kúızelgenderin» jetkizdi.
Býkıngem saraıy taratqan málimdemede:
– Biz osy aýyr ári tragedııalyq jaǵdaıdan zardap shekken barlyq elderdiń azamattaryna, olardyń otbasylary men jaqyndaryna shyn júrekten tilektestigimizdi bildiremiz. Olar qazir súıikti jandarynan habar kútip otyr, – delingen.
76 jastaǵy monarh sondaı-aq:
– Osyndaı qıyn sátte kómek kórsetip jatqan jedel qyzmet ókilderine jáne barlyq eriktilerge erekshe alǵys bildiremin, – dep atap ótti.
Buǵan deıin negizi Air India apatynda 242 jolaýshynyń bári qaza tapqany habarlanǵan edi.