Úndistandaǵy sý tasqynynan qaza tapqandar sany 100-ge taıady
ASTANA. KAZINFORM — Úndistannyń soltústik-shyǵysyndaǵy Assam shtatynda bolǵan sý tasqynynan qaza tapqandar sany 97 adamǵa jetti. Bul týraly shtattyń Tabıǵı apattardyń saldaryn joıý basqarmasy habarlady, dep jazady BelTA.
— Tabıǵı apattan qaza tapqandardyń jalpy sany 97 adamǵa jetti. Al 15 aýdanda zardap shekkender sany 168 myńnan asty, — delingen basqarma málimetinde.
5 tamyzda 14 aýdanda shamamen 160 myń adam sý tasqynynan zardap shekkeni habarlanǵan bolatyn. Qazir shtattyń 6 aýdanynda ýaqytsha ornalastyrý jáne gýmanıtarlyq kómek kórsetýge arnalǵan 133 lager jumys istep tur. Onda evakýatsııalanǵan 45 myńǵa jýyq turǵyn panalap, qajetti kómek alyp jatyr.
Basqarma málimetinshe, 481 eldi meken áli de sý astynda qalyp otyr. Sonymen qatar jalpy aýmaǵy 14 382,26 gektar egistik alqaptaryn sý basty. Keıbir aýdandarda bógetter, joldar, kópirler jáne basqa da ınfraqurylym nysandary zaqymdanǵan. Tabıǵı apat saldarynan shtat boıynsha 41 475 bas úı janýary men qus zardap shekken.
Osydan bir aı ýaqyt buryn Úndistannyń batysyndaǵy Maharashtra shtatynda nóserli mýsson jańbyrynan bolǵan kóshkinder men sý tasqyny saldarynan 13 adam qaza taýyp, taǵy 10 adam jaraqat alǵan bolatyn.
