Úndistandaǵy sý tasqynynan eki shtatta 90 adam qurban boldy
ASTANA. KAZINFORM – Úndistannyń soltústik-shyǵysyndaǵy Assam shtatynda sý tasqynynan qaza bolǵandar sany 82 adamǵa jetti, dep habarlaıdy Anadoly.
Hindustan Times basylymynyń Assam shtatynyń Tabıǵı apattardyń saldaryn joıý basqarmasyna (ASDMA) silteme jasap habarlaýynsha, tasqyn saldarynan 200 myńnan astam turǵyn zardap shekken.
Assam shtatynyń bas mınıstri Hımanta Bısva Sarma jaǵdaıdyń birtindep turaqtalyp kele jatqanyn jáne keıbir turǵyndardyń úılerine qaıta orala bastaǵanyn aıtty. Onyń sózinshe, qalpyna keltirý jáne ońaltý jumystary óńir bıliginiń basty basymdyǵy bolyp qala beredi.
Sondaı-aq ol úkimettiń shuǵyl kómek kórsetýge, ótemaqy tóleýge, halyqtyń turmys-tirshiligin qalpyna keltirýge, mektepterdi jóndeýge jáne búlingen ınfraqurylymdy qaıta jańǵyrtýǵa erekshe kóńil bólip otyrǵanyn jetkizdi.
Osy ýaqytta Úndistannyń ońtústigindegi Kerala shtatynda birneshe kúnge sozylǵan nóser jaýynnan keıin iri sý tasqyny boldy.
India Today basylymynyń málimetinshe, tabıǵı apattan segiz adam qaza taýyp, taǵy segiz adam iz-túzsiz joǵalǵan. Qazirgi ýaqytta izdestirý-qutqarý jumystary júrip jatyr.
Tabıǵı apat saldarynan myńdaǵan turǵyn úılerin tastap ketýge májbúr boldy. Shtattyń 12 aýdanynda qaýiptiń «qyzǵylt sary» deńgeıi jarııalanǵan.
Kerala bıligi qaza tapqandardyń otbasylaryna, sondaı-aq baspanasy men tabys kózinen aıyrylǵan turǵyndarǵa qajetti kómek kórsetiletinin málimdedi.
Maýsymnan qyrkúıekke deıin jalǵasatyn mýssondyq jańbyrlar jyl saıyn Ońtústik Azııa elderinde, ásirese Úndistan men Pákistanda aýqymdy sý tasqyny men ózge de tabıǵı apattarǵa sebep bolady.
Materıal Kazinform agenttigine seriktes Anadolu agenttigi usynǵan.
Eske sala keteıik, buǵan deıin Úndistannyń Assam shtatynda tolassyz jaýǵan jańbyrdan bolǵan alapat sý tasqyny saldarynan barlyq shuǵyl qyzmetterdiń kúsheıtilgen rejımde jumys istep jatqany jáne qaza tapqandar sanynyń 47 adamǵa jetkeni habarlanǵan bolatyn.
