Úndistandaǵy sý daǵdarysy sýsyn óndiretin kompanııalarǵa qaýip tóndirip otyr

ASTANA. KAZINFORM — Úndistannyń soltústik-batysyndaǵy Radjasthan shtatynda álemdegi eń iri sýsyn óndirýshi kompanııalardyń birqatary sarqylyp bara jatqan sý qoryn qamtamasyz etý jáne ony basqarý máselesine tap boldy. Bul týraly AZERTADJ habarlady.

Olar qatań úkimettik talaptardy saqtaı otyryp, jergilikti turǵyndardyń narazylyǵyn da eskerýge májbúr. Sebebi keı eldi mekenderde halyq qubyr arqyly sýdy aptasyna bir-aq ret alady.

Agenttiktiń habarlaýynsha, Radjasthan aýmaǵynyń shamamen úshten eki bóligin Tar shóli alyp jatyr.

Sonymen qatar bul shtatta jerasty sýyn óndirý kólemi Úndistandaǵy eń joǵary deńgeılerdiń biri sanalady. Bul jaǵdaı 85 mıllıon halyqtyń, qarqyndy damyp jatqan týrızm salasynyń, ónerkásiptiń jáne iri aýyl sharýashylyǵy sektorynyń qajettilikteri arasynda tepe-teńdik saqtaýǵa tyrysqan shtat ekonomıkasyna qosymsha salmaq túsiredi.

Álemdegi eń halqy kóp el – Úndistannyń zańdary shtattar arasynda alkogol ónimderin arnaıy ruqsatsyz tasymaldaýǵa tyıym salady. Sonyń saldarynan kompanııalar sý tapshylyǵyna qaramastan, ónimin satqysy kelgen árbir shtatta jeke óndiris ashýǵa májbúr.

Heineken kompanııasynyń jahandyq turaqty damý jónindegi aǵa dırektory Sonı Tımmıanyń aıtýynsha, Úndistanda sý tapshylyǵy barǵan saıyn kúrdeli máselege aınalyp keledi. Onyń sózinshe, birneshe jyl buryn eldiń keıbir qalalarynda sýǵa degen suranys usynystan asyp túsýge shaq qalǵan.

Sýsyn óndirýshi kompanııalardyń qıyndyqtary Úndistandaǵy aýqymdy sý daǵdarysynyń bir kórinisi ǵana. Álem halqynyń 17 paıyzy turatyn bul elde tuşy sý qorynyń nebári 4 paıyzy ǵana shoǵyrlanǵan. Sondyqtan Úndistan shekteýli sý resýrstaryna túsetin salmaqty azaıtý joldaryn kúsheıte túsýi qajet.

Budan buryn Úndistannyń Ambıkapýr qalasynda Garbage Cafe atty dámhanalar jelisi kelýshilerge túski asty 1 keli plastık qoqysqa aıyrbastap beretinin jazǵanbyz.