Úndistandaǵy kóshkin qurbandarynyń sany 358 adamǵa jetti
ASTANA. KAZINFORM – Úndistannyń ońtústigindegi Kerala shtatynda tolassyz jaýǵan jańbyr saldarynan qaza tapqan adamdar sany 358-ge jetti. Bul týraly India Today habarlady.
Jergilikti bıliktiń habarlaýynsha, izdeý-qutqarý jumystary áli jalǵasyp jatyr. 200-den astam adam iz-túzsiz joǵalǵandar tiziminde. Úndistan armııasy úıindiler astynda qalǵan adamdardy izdeý úshin aımaqqa kómekshi arnaıy radarlar jiberdi.
Buǵan deıin sheneýnikterdiń habarlaýynsha, Kerala óz tarıhyndaǵy eń aýyr tabıǵı apattardyń birine tap boldy. Qazir shtatta 1 500-den astam sarbazdyń kómegimen izdeý-qutqarý jumystary júrip jatyr. Qutqarýshylar elektr qýatynyń joqtyǵynan jáne aǵashtar qulap, kópirler qırap, joldardy bógep tastaǵany úshin izdestirý jumystary qıyn bolǵanyn habarlady.
Shtattaǵy tabıǵı apattan zardap shekken 8 300-den astam adam ýaqytsha lagerlerge kóshirildi. Tolassyz jaýǵan jańbyrdan Kerala shtatynda kóshkin paıda bolyp, ınfraqurylym men joldarǵa qatty zaqym keltirdi. Zardap shekken Chýralmala aýylynda 200 úı qıraǵan.
Bılik qaza bolǵandardyń týystaryna 2 400 dollardan, jaralanǵandardyń árqaısysyna 600 dollardan tóleıtinin habarlady.
Eske sala keteıik, osyǵan deıin Úndistandaǵy kóshkin saldarynan 150-den astam adamnyń qaza tapqanyn habarlaǵan edik.
