Úndistandaǵy Assam shtatynda sý tasqynynan qaza bolǵandar sany 47 adamǵa jetti
ASTANA. KAZINFORM – Úndistannyń Assam shtatynda bolǵan sý tasqynynan qaza tapqandar sany artty. Tabıǵı apattan 720 myńnan astam adam zardap shekti. Bul týraly Anadoly habarlaıdy.
Kúshti jaýyn-shashyn men sonyń saldarynan bolǵan sý tasqynynan Úndistannyń soltústik-shyǵysyndaǵy Assam shtatynda qaza tapqandar sany 47 adamǵa jetti.
Hindustan Times basylymynyń Assam shtatynyń Tabıǵı apattardyń saldaryn joıý basqarmasyna (ASDMA) silteme jasap habarlaýynsha, Sıvasagar jáne Charaıdeo aýdandarynda taǵy alty adam kóz jumǵan.
ASDMA-nyń sońǵy esebine sáıkes, sý tasqyny shtattyń 13 aýdanyndaǵy 721 myń adamǵa áser etken.
24 myńǵa jýyq turǵyn ýaqytsha evakýatsııalaý ortalyqtaryna ornalastyryldy.
Assam shtatynyń bas mınıstri Hımanta Bısva Sarma 70-80 adamnyń áli kúnge deıin iz-túzsiz joǵalǵanyn málimdedi.
Onyń aıtýynsha, qaza tapqandar sany áli de artýy múmkin.
Ońtústik Azııada maýsymnan qyrkúıekke deıin jalǵasatyn mýsson maýsymy jyl saıyn Úndistanda, Pákistanda jáne óńirdiń ózge de elderinde iri sý tasqyndary men basqa da tabıǵı apattarǵa sebep bolady.
Buǵan deıin Pákistandaǵy nóser jaýynnan 13 adam qaza taýyp, ondaǵan turǵyn jaraqat alǵany týraly jazdyq.
