Úndistandaǵy apat: qaza tapqandardyń naqty sany DNQ saraptamasynan keıin jarııalanady

ASTANA. KAZINFORM —  Úndistannyń batysyndaǵy Air India áýe kompanııasynyń Boeing 787 Dreamliner ushaǵynyń apatqa ushyraýy nátıjesinde qaza tapqandardyń naqty sany DNQ saraptamalary aıaqtalǵannan keıin belgili bolady, dep habarlaıdy TASS.

Bul týraly apat ornyna kelgen Úndistannyń ishki ister mınıstri Amıt Shah jýrnalısterge málimdedi.

Onyń aıtýynsha, ushaq bortynda 230 jolaýshy men 12 ekıpaj múshesi bolǵan. 

Ol apatqa ushyraǵan ushaqta bir adamnyń aman qalǵanyn rastady.

— Búgin kúndiz Air India kompanııasynyń AI171 reısin oryndaǵan ushaǵy apatqa ushyrady. Kóptegen jolaýshy qaza tapty dep qaýiptenemiz. Ushaqta 230 jolaýshy jáne 12 ekıpaj múshesi bolǵan. Bir adamnyń aman qalǵany kóńilge medeý boldy. Qaza tapqandardyń naqty sany DNQ saraptamalarynan keıin jarııalanady, — dedi qosty Amıt Shah.

Air India áýe kompanııasyna tıesili Boeing 787 Dreamliner ushaǵy bortynda 242 adammen Úndistannyń batysyndaǵy Ahmedabad qalasynyń mańynda ornalasqan turǵyn aýdanǵa ushyp shyqqannan keıin birden qulap tústi. Ushaq Londonǵa baǵyt alǵan bolatyn. The New Indian Express gazetiniń habarlaýynsha, apat saldarynan 310-nan astam adam qaza tapqan, olardyń arasynda ushaqtaǵy jolaýshylarmen qatar jataqhana turǵyndary da bar.

Aıta ketelik búgin bortynda 240 adam bolǵan Air India ushaǵy apatqa ushyrap, dárigerlerge arnalǵan jataqhana ǵımaratyna qulaǵan. SІM apatqa ushyraǵan bortta zardap shekken qazaqstandyqtar joq dep málimdedi. Sonymen qatar bir jolaýshy tiri qalǵany týraly da jazǵan edik. Sondaı-aq  Ulybrıtanııa Úndistandaǵy áýe apaty bolǵan jerge tergeýshilerin jiberedi.