Úndistanda ustalǵan Unity tankerindegi qazaqstandyq teńizshi kemeden túsip, elden ketedi — SІM
ASTANA. KAZINFORM — Úndistan jaǵalaýynda ustalǵan Unity tankeriniń ekıpajyndaǵy Qazaqstan azamaty kemeden túsedi. Bul aqparatty QR Syrtqy ister mınıstrligi rastady, dep habarlaıdy Kazinform tilshisi.
— Úndistannyń Paradıp portynda ustalǵan MT UNITY kemesiniń ekıpajyndaǵy qazaqstandyq teńizshi jaqyn ýaqytta kemeden túsip, qonaqúıge ornalastyrylady dep kútilýde. Osydan keıin ol Úndistan aýmaǵynan ketedi, — dep habarlady SІM.
Vedomstvo ókilderiniń málimetinshe, qazaqstandyq dıplomattar otandasymyzǵa konsýldyq qoldaý kórsetýdi jalǵastyryp jatyr.
— Jaǵdaı Qazaqstan Respýblıkasy Syrtqy ister mınıstrliginiń baqylaýynda, — delingen habarlamada.
Buǵan deıin Úndistanda ustalǵan Unity tankeriniń alǵashqy ekıpaj músheleri elderine qaıtaryla bastaǵany habarlanǵan bolatyn.
Sheteldik BAQ-tyń málimetinshe, Unity tankeri 11 mamyrdan beri Úndistannyń Paradıp porty mańyndaǵy zákir turaǵynda qamaýda tur. Keme Kamerýn týymen júzedi.
Teńizshilerdiń týystarynyń aıtýynsha, tankerdiń ıesi — Bluetide Charters FZE kompanııasy. Olardyń málimetinshe, keme uzaq ýaqyt boıy turaqta turǵan kezde ekıpaj azyq-túlik pen aýyzsý tapshylyǵyna tap bolǵan. Sonymen qatar baılanys úzilip, tehnıkalyq aqaýlar týyndaǵan.
6 qazanda Orıssa shtatynyń Joǵarǵy soty Úndistan bıligin Unity kemesiniń ekıpajyn otanyna qaıtarý úshin shuǵyl sharalar qabyldaýǵa mindettedi.
Kemede Reseıdiń 20 azamaty, sondaı-aq Mysyr men Qazaqstan azamattary bolǵan. Sot Úndistannyń saýda keme qatynasy týraly zańyna súıene otyryp, keme ıesi ekıpajdy qajetti kómeksiz qaldyrǵanyn moıyndady. Úndistan tarapyna teńizshilerdi kemeden túsirýdi, elderine qaıtarýdy jáne ekıpajdy aýystyrýdy qysqa merzimde uıymdastyrý tapsyryldy.
17 qyrkúıekte QR Syrtqy ister mınıstrligi Qazaqstan azamaty bolǵan tankerdiń ustalǵanyn rastady. Sondaı-aq jaǵdaıdy retteýge járdemdesý týraly ótinishpen Úndistan tarapyna dıplomatııalyq nota joldanǵanyn habarlady.
Bir aıdan keıin, 17 qazanda, bortynda qazaqstandyq teńizshi bar qamaýdaǵy tankerdi satý josparlanyp otyrǵany týraly aqparat tarady.
