Úndistanda ustalǵan, bortynda qazaqstandyq bar tanker satylýy múmkin
ASTANA. KAZINFORM — Úndistan jaǵalaýynda ustalǵan, bortynda Qazaqstan azamaty bar Unity tankerin satý josparlanyp otyr. Alaıda ekıpaj aýystyrylmaıynsha, teńizshiler kemeden kete almaıdy, dep habarlaıdy Kazinform agenttigi TASS-qa silteme jasap.
TASS agenttigine tankerdegi teńizshilerdiń biriniń týysy kemeni satý jospary týraly málimdegen.
— Bizge kemeni satýdy josparlap otyrǵanyn aıtty. Balalarymyzdy satqanǵa deıin kemede qaldyryp ketpese eken dep alańdaımyz, — dedi agenttik suhbat bergen adamú
Onyń aıtýynsha, ekıpaj músheleri olardyń ornyna keletin teńizshiler jetkenshe tankerden kete almaıdy.
Buǵan deıin teńizshilerdiń týystary ekıpaj músheleriniń moraldyq jaǵdaıy nasharlaǵanyn jáne keıbiriniń densaýlyǵyna qatysty máseleler týyndaǵanyn habarlaǵan. Teńizshilerdiń biri aýrýhanaǵa jatqyzylǵan.
Kamerýn týymen júzetin Unity tankeri 11 mamyrdan beri Úndistannyń Paradıp porty mańynda zákirde tur. Keme ıesine qarjylyq talaptar qoıylýyna baılanysty týyndaǵan daý saldarynan tankerdi bılik ustap otyr. Daýdyń eki taraby da — BAÁ-de tirkelgen kompanııalar. Qazir bul is Odısha shtatynyń Joǵarǵy sotynda qaralyp jatyr.
Aıta keteıik, 2026 jylǵy 6 qazanda Odısha shtatynyń Joǵarǵy soty ekıpajdy kemeden túsirý jáne elderine qaıtarý, sondaı-aq kemedegi ekıpajdy aýystyrý úshin shuǵyl sharalar qabyldaýdy mindettegen. Teńizshilerdi elderine qaıtarý shyǵyndary keme ıesinen óndirilip alynýy múmkin.
Qazaqstan Syrtqy ister mınıstrliginiń málimetinshe, Úndistannyń Paradıp portynda 23 teńizshisi bar MT UNITY kemesi ustalǵan. Olardyń biri — Qazaqstan azamaty. QR Syrtqy ister mınıstrliginiń resmı ókili Janbolat Úsenov te kemeniń ustalýyna baılanysty Qazaqstan tarapy nota joldaǵanyn málimdegen.
