Úndistanda ushaq apaty boıynsha aldyn ala esep jarııalandy

ASTANA. KAZINFORM –  Úndistannyń Áýe apattaryn tergeý bıýrosy (AAIB) 12 maýsym kúni Ahmedabad qalasynda bolǵan Air India áýekompanııasy ushaǵynyń apatyna qatysty aldyn ala tergeý esebin jarııalady. 

Qujatta kórsetilgendeı, apat ornynda júrgizilgen jumystar, sonyń ishinde drondar kómegimen jasalǵan foto jáne vıdeo túsirilimder aıaqtalǵan. Ushaq synyqtary áýejaı mańyndaǵy qaýipsiz aımaqqa jetkizilgen.

— Qos qozǵaltqysh ta apat ornynan alynyp, áýejaı angarynda ornalastyryldy, — delingen esepte.

Aldyn ala qorytyndyǵa sáıkes, ushaq kóterile sala birneshe sekýnd ishinde 1 jáne 2-dvıgatelderdiń janarmaı berý tetikteri «jumys istep tur» degen qalyptan «óshirýli» jaǵdaıǵa ótken, alaıda birneshe sekýndtan soń qaıta qosylǵan.

Pılottar arasyndaǵy áńgime jazbalarynda olardyń abyrjyp qalǵan sáti tirkelgen. Ushqyshtardyń biri «Siz nege qozǵaltqyshtardy óshirdińiz?» dep suraıdy. Ekinshi ushqysh bolsa «Men eshteńe istegen joqpyn» dep jaýap bergen.

Tergeý jalǵasyp jatyr. Bıýro túpkilikti esepte qosymsha qorytyndylardy jarııalamaq. Qazirgi kezeńde Boeing 787-8 ushaǵynyń qozǵaltqyshtaryn paıdalaný qaýipsizdigine qatysty eshqandaı resmı usynystar berilgen joq. 

Aıta ketelik búgin bortynda 240 adam bolǵan Air India ushaǵy apatqa ushyrap, dárigerlerge arnalǵan jataqhana ǵımaratyna qulaǵan. SІM apatqa ushyraǵan bortta zardap shekken qazaqstandyqtar joq dep málimdedi. Sonymen qatar bir jolaýshy tiri qalǵany týraly da jazǵan edik.