Úndistanda týrısterge jasalǵan shabýyldan birneshe adam qaza tapty
NЬıÝ-DELI. KAZINFORM – Úndistannyń soltústigindegi Djammý men Kashmır odaqtas aımaǵynda bolǵan qarýly shabýyldan keminde 25 týrıst qaza taýyp, 20-ǵa jýyq adam jaraqat alǵan, dep habarlady TASS.
Bul týraly The Print portaly qorǵanys jáne qaýipsizdik salasyndaǵy derekkózderge silteme jasap málimet taratty. Alaıda ózge úndi aqparat quraldary qaıtys bolǵandar sanyna qatysty ártúrli derek keltirýde. Resmı bılik ázirge naqty sandy jarııalaǵan joq.
Shabýyl Pahalgam aımaǵynda bolǵan. Belgisiz qarýly adamdar Baısaran ańǵary boıymen jaıaý kóterilip kele jatqan týrısterge oq jaýdyrǵan. Oqıǵa ornyna dereý qaýipsizdik kúshteri men medıtsına qyzmetkerleri kelgen. Jergilikti bılik bul shabýyldy lańkestik áreket dep atady.
Úndistan Premer-mınıstri Narendra Modı Saýd Arabııasyna sapary barysynda eldiń Іshki ister mınıstri Amıt Shahpen telefon arqyly sóılesip, barlyq qajetti sharany qabyldaýdy jáne oqıǵa ornyna barýdy tapsyrdy.
Óz kezeginde mınıstr Amıt Shah bul jantúrshigerlik shabýyldyń uıymdastyrýshylary jazasyz qalmaıtynyn aıtyp, Djammý men Kashmırge jol tartyp ketkenin habarlady. Onda ol barlyq vedomstvomen shuǵyl qaýipsizdik keńesin ótkizbek.
Aıta keteıik, buǵan deıin AQSh-taǵy úndilik stýdentter usaq-túıek tártip buzǵany úshin de deportatsııalanýy múmkin ekenin jazǵan edik.