Úndistanda toǵyz polıtseı ólim jazasyna kesildi
ASTANA. KAZINFORM – Úndistanda COVID-19 pandemııasy kezinde qamaýda bolǵan áke men balanyń ólimine qatysy bar toǵyz polıtseı ólim jazasyna kesildi, dep habarlaıdy VVS.
58 jastaǵy P.Jaıaradj jáne onyń 38 jastaǵy uly Benıks eldiń ońtústigindegi Tamılnad shtatyndaǵy túrmede kóz jumdy. Olar COVID-19 pandemııasy kezinde karantın talaptaryn buzdy degen kúdikpen ustalǵan edi. Naqtyraq aıtqanda, ózderiniń uıaly telefon dúkenin ashyq ustaǵany úshin qamaýǵa alynǵan.
Dúısenbi kúni úkim shyǵarǵan sýdıa eki er adamnyń bir-biriniń kóz aldynda sheshindirilip, asa qatygezdikpen soqqyǵa jyǵylǵanyn aıtyp, bul isti bılikti ashyq túrde asyra paıdalaný dep atady.
— Olar muny óltirý nıetimen jasady, — dedi sýdıa.
Polıtseıler ótken aıda kisi óltirdi dep tanylǵan. Olar sot úkimine shaǵym túsire alady.
— Olar qarýsyz adamdarǵa shabýyl jasady. Olardy keshirýge bolmaıdy. Jasy nemese otbasylyq jaǵdaıyna qarap, jeńil jaza taǵaıyndaýǵa bolmaıdy. Olardyń barlyǵy — bilimdi adamdar, — dedi sýdıa úkim shyǵarý kezinde.
Jalpy alǵanda, áke men balanyń qatygezdikpen óltirilýine baılanysty on polıtseı qamaýǵa alynǵan. Alaıda aıyptalýshylardyń biri 2020 jyly COVID-19 indetinen qaıtys boldy.
Bul oqıǵa Tamılnadta jappaı narazylyq týdyrdy. Kóshege shyqqandardyń arasynda shtattaǵy oppozıtsııa depýtattary da boldy.
Oppozıtsııa jetekshisi Rahýl Gandı men úndi krıketiniń juldyzy Shıkhar Dhavan áleýmettik jelilerde osy eki azamatqa ádildik talap etkenderdiń qatarynda boldy.
Bul ólim oqıǵasy Úndistandaǵy polıtsııa ozbyrlyǵy máselesine qoǵam nazaryn qaıta aýdartty.
Quqyq qorǵaý uıymdarynyń málimetinshe, Úndistanda jyl saıyn júzdegen adam qamaýda kóz jumady. Olar kúdiktilerden moıyndatý alý úshin azaptaý men qorlaý polıtsııa tájirıbesiniń bir bóligine aınalǵanyn aıtady.
Osy jyldyń basynda BUU-nyń birneshe sarapshysy Úndistandy polıtsııa qyzmetin halyqaralyq adam quqyqtary standarttaryna sáıkestendirý úshin aýqymdy reformalar júrgizýge shaqyrǵan edi.
Aıta keteıik, buǵan deıin Qazaqstan men Úndistan krımınalıstıka jáne tsıfrlyq tergeý boıynsha birlesken baǵdarlama ázirleıtinin jazdyq.