Úndistanda sý tasqynynan qaza tapqandar sany 30-dan asty
ASTANA. KAZINFORM — Úndistannyń soltústik-shyǵysyndaǵy Assam shtatynda nóser jaýynnan bolǵan sý tasqynynan 31 adam kóz jumdy. Bul týraly shtattyń Tótenshe jaǵdaılardyń saldaryn joıý basqarmasy habarlady, dep jazady Anadoly.
Málimetke sáıkes, sońǵy bir táýlikte tabıǵı apattan taǵy 21 adam kóz jumǵan.
Shtattyń bas mınıstri Hımanta Bısva Sarmanyń aıtýynsha, sý tasqynynan shamamen 700 myń adam zardap shekken. Sondaı-aq úsh adam iz-túzsiz joǵalǵandar qatarynda.
Ońtústik Azııada mýsson maýsymy jyl saıyn iri kólemdegi sý tasqyny men kóshkinderge sebep bolady. Bul tabıǵı qubylystan eń kóp zardap shegetin elder — Úndistan men Pákistan.
Aıta keteıik, Aýǵanstannyń shyǵysyndaǵy Nýrıstan provıntsııasynda mýsson jańbyrynan bolǵan sý tasqyny 20 adamnyń ómirin qıdy. Sondaı-aq 100-den astam adam iz-túzsiz joǵaldy.
