Úndistanda Pahalgamdaǵy terrorlyq shabýylǵa jaýap qaıtarý nusqalary qaraldy

ASTANA. KAZINFORM — Jeksenbi kúni Úndistan Áskerı-áýe kúshteri shtabynyń bastyǵy áýe marshaly Amar Prıt Sıngh premer-mınıstr Narendra Modımen kezdesti, dep habarlaıdy The Indian Express.

ÁÁK basshysy premer-mınıstrdi Pahalgamdaǵy terrorlyq shabýyldan keıin úkimet qarastyryp jatqan qarsy sharalar kontekstinde kúshterdiń daıyndyǵy týraly habardar etti.

Kezdesý qorytyndysy boıynsha resmı málimdeme jasalmaǵanymen, múmkin bolatyn is-áreket baǵyttary talqylandy.

Kezdesý Áskerı-teńiz kúshteriniń bas admıraly Dınesh Trıpatı premer-mınıstrdi Arab teńizindegi jaǵdaı týraly habardar etkennen birneshe saǵattan soń ótti.

Áskerı-áýe kúshteri men Áskerı-teńiz kúshteri basshylarynyń premer-mınıstrmen jeke kezdesýleri 29 sáýirde premer-mınıstrdiń rezıdentsııasynda áskerı basshylyqtyń kezdesýinen keıin boldy. Onda Modı qarýly kúshterdiń Pahalgam shabýylyna «jaýap berý tásilin, maqsatyn jáne ýaqytyn sheshýge tolyq operatsııalyq erkindigi bar» dep málimdedi.

Aıta keteıik, 30 sáýirde Úndistan men Pákistan shekarasynda atys bolǵany týraly habarlaǵan edik.

Eske sala ketsek, 22 sáýir kúni qarýly adamdar Djammý men Kashmır odaǵy aýmaǵyndaǵy áıgili týrıstik qala — Pahalgamda terrorlyq shabýyl jasaǵan bolatyn. Áskerı kıim kıgen adamdar avtomattarmen oq jaýdyrǵan, 25 úndi azamaty men 1 nepaldyq qaza tapty. Qylmyskerler oqıǵa ornynan qashyp úlgergen.

Buǵan deıin Úndistan Pahalgamdaǵy teraktiden keıin Pákistanǵa qarsy sharalar jarııalady.