Úndistanda oqýshylar mingen qaıyq aýdarylyp, kem degende 6 bala sýǵa batyp ketti

ÚNDІSTAN. KAZINFORM — Jergilikti BAQ-tyń habarlaýynsha, Úndistannyń Gýdjarat shtatynda Vadodara qalasynyń mańyndaǵy Harnı Motnath kólinde 27 (basqa derek boıynsha 23) oqýshy mingen qaıyq aýdarylǵan.

Qazir qutqarý jumystary júrip jatyr. Habarlarǵa qaraǵanda, bes adam qutqarylǵan.

Biraq kem degende alty adam sýǵa ketken, qaza bolǵandardyń sany áli de artýy múmkin.

Balalar jekemenshik mektepte oqıtyn jáne mekteptiń uıymdastyrýymen saıahatqa shyqqan. 

Oqıǵa kýágerleri eshbir jolaýshynyń ústinde qutqarý keýdeshesi bolmaǵanyn alǵa tartty.

«Mektep oqýshylary mingen qaıyq aýdarylyp, alty balanyń qaza tapqanyn jańa ǵana bildim. Qutqarý jumystary jalǵasyp jatyr», — dedi Gýdjarattyń bilim mınıstri Kýber Dındor IndiaTVnews arnasyna bergen suhbatynda.

Tótenshe jaǵdaıǵa qarsy ulttyq kúsh-quraldar men órt sóndirý bólimsheleri basqa organdarmen birlesip jumys isteýde. 

«Osynda pıknıkke kelgen mektep oqýshylary mingen qaıyq túste Harnı kólinde aýdarylyp qaldy. Órt sóndirýshiler jeti balany qutqardy, iz-túzsiz joǵalǵandardy izdep jatyrmyz», — dedi Vadodara órt sóndirý bóliminiń bastyǵy Part Brahmhatt.

Onyń aıtýynsha, qutqarýshylar oqıǵa ornyna jetkenshe jergilikti turǵyndar birneshe balany sýdan shyǵaryp úlgergen. 

VIDEO | Boat carrying students capsizes in a lake in Gujarat’s Vadodara, casualties feared. More details awaited. pic.twitter.com/UbFFbqofjN

— Press Trust of India (@PTI_News) January 18, 2024