Almatyda iri orman tálimbaǵy salynady
ALMATY. KAZINFORM – Almaty ákimdigi megapolıste alǵashqy iri orman tálimbaǵyn ashýdy kózdep otyrǵanyn habarlady.
Qala ákimdiginiń málimetinshe, qazir Almatyda jergilikti klımatqa beıimdelgen aǵash pen buta kóshetterin ósiretin arnaıy alań joq. Bul kógaldandyrý júıesiniń damýyn tejep, apatty jáne qýraǵan aǵashtardy almastyrýdy, sondaı-aq kesilgen aǵashtyń ornyna tal egý jumystaryn qıyndatady. Sondyqtan tálimbaq kógaldandyrý jumystaryn jedeldetýge múmkindik beredi.
– Óz tálimbaǵy bolmaǵan qala árdaıym syrttan tasymaldanatyn kóshetterge táýeldi. Bul otyrǵyzylatyn materıaldyń sapasy kóńilden shyqpaýyna nemese shyǵynnyń kóp bolýyna ákeledi, – deıdi qalanyń Ekologııa jáne qorshaǵan orta basqarmasynyń mamandary.
Júrgizilgen zertteý nátıjesinde qalada pıtomnıkke laıyq oryn anyqtaldy. Aýmaǵy 150 gektar bolatyn jer bederi tegis, topyraǵy qunarly, klımaty qolaıly jer telimi tańdaldy.
– Ekologter men ýrbanıster qalanyń qarqyndy ósýi men klımattyń ózgerýi jaǵdaıynda mundaı qadamdardyń asa mańyzdy ekenin aıtady. Shahar jaı ǵana aǵash otyrǵyzýmen shektelmeı, endi olardy ózi ósire bastaıdy, - dep habarlady ákimdikten.
Eske salaıyq, buǵan deıin Almatyǵa bıiktigi 6 metrden asatyn iri kóshetter otyrǵyzylatynyn jazǵanbyz.