Úndistanda mýzyka daýsynan 140 taýyq qyrylyp qaldy: fermer dıdjeıdi sotqa berdi
ASTANA. KAZINFORM – Úndistannyń Ýttar-Pradesh shtatynda fermerlikpen aınalysatyn turǵyn úılený toıynda mýzyka qoıǵan jergilikti dıdjeıdi qustarynyń jappaı qyrylýyna kinálady. Onyń aıtýynsha, shamadan tys qatty dybys saldarynan 140 taýyq ólgen, osyǵan baılanysty fermer polıtsııaǵa aryz túsirgen. Bul týraly jergilikti NDTV jazdy.
Telearna málimetine súıensek, oqıǵa Sýltanpýr okrýginde bolǵan. Úılený toıynyń sherýi dıdjeımen birge shtattaǵy aýyldardyń birinde júrip ótken. Fermer Sabır Alı shamamen saǵat 21:30 shamasynda, sherý onyń sharýashylyǵynyń janynan ótken kezde, qatty dybys saldarynan 140 taýyqtyń júregi toqtaǵanyn málimdedi.
– Dybys sonshalyqty qatty boldy, taýyqtar qorqyp, qyrylyp qaldy, – dep keltiredi NDTV Alıdiń jergilikti polıtsııaǵa bergen aryzynan úzindini.
Telearna habarlaǵandaı, beısenbi kúni quqyq qorǵaý organdary osy aıyptaýlar boıynsha dıdjeıge qatysty is qozǵaǵan. Qazir tergeý júrgizilip jatyr. Táýliktiń bul ýaqytynda ruqsat etilgen dybys deńgeıi asqan-aspaǵany jáne onyń úı qustarynyń ólimine tikeleı áseri bolǵan-bolmaǵany anyqtalyp jatyr.
Al mamandardyń aıtýynsha, joǵary jıilikti dybys tolqyndary qustar men janýarlarda qatty kúızelis týdyryp, kóp jaǵdaıda júrektiń toqtaýyna ákelýi múmkin.
Aıta keteıik, jýyrda Qytaıda ajyrasyp jatqan erli-zaıyptylar 29 taýyqty teń bólip aldy. Olar sońǵy 29-taýyqty qalaı bólip alǵanyn myna materıaldan oqı alasyzdar.
