Úndistanda kún 50 gradýsqa deıin ysydy

ASTANA. KAZINFORM – Úndistan astanasy Delıde jańa rekordtyq aýa temperatýrasy tirkelip, termometr baǵanasy +49,9°C-qa jetti, dep habarlaıdy Business Standard. 

Úndistan Meteorologııalyq departamentiniń (IMD) málimetinshe, Mýngeshpýr men Narela sııaqty keıbir aýdandarda temperatýra 49,9°C-qa jetti, bul qalypty deńgeıden 9 gradýsqa joǵary.

Nadjafgardta aýanyń temperatýrasy 49,8°C boldy.

Delıdiń Safdardjýngtaǵy negizgi observatorııasy ortasha temperatýrany 48,5°C dep tirkedi, bul qalypty normadan 5 gradýs joǵary. 

Delıde sońǵy 100 jylda tirkelgen eń joǵary temperatýra 2022 jyldyń 15-16 mamyrynda tirkelgen – 49,2°C. 

Úndistannyń keıbir shtattarynda qyzyl dabyl deńgeıinde rekordtyq temperatýra baıqalyp otyr.  

Bul eskertý barlyq jas toptary úshin kún ótý jáne ystyqqa baılanysty aýrýdyń yqtımaldyǵy óte joǵary ekenin kórsetedi.

Buǵan deıin Úndistan astanasynda qatty aptap ystyq bolyp, aýa temperatýrasy +47,8 gradýsqa jetkeni habarlanǵan bolatyn. Sondaı-aq eldiń Harıana, Datııa, Ýttar-Pradesh jáne Djansı shtattarynda +47 gradýs jáne odan joǵary temperatýra tirkeldi.