Úndistanda krıket stadıonynda bolǵan keptelis saldarynan 11 adam mert boldy

ASTANA. KAZINFORM – Sársenbi kúni Úndistannyń ońtústigindegi Bangalor qalasynda krıket stadıonynyń mańynda bolǵan alasapyran kezinde kem degende 11 adam qaza taýyp, taǵy 50 adam jaraqat aldy, dep habarlaıdy Sınhýa. 

Oqıǵa Mangalam Chınnasvamı atyndaǵy stadıon janynda boldy, onda myńdaǵan krıket jankúıeri Royal Challengers Bengaluru (RCB) komandasynyń Úndistan premer-lıgasynyń birinshi tıtýlyn jeńip alǵanyn toılaýǵa jınaldy.

- Jaraqattanǵandar Boýrıng, Ledı Kerzon jáne Vaıdehı aýrýhanalaryna jetkizildi. Boýrıngte alǵan jaraqattarynan jeti adam, al Vaıdehıde taǵy tórt adam qaza boldy, - delingen News18 arnasynyń habarlamasynda.

RCB chempıondyq tıtýlyn 18 jylda alǵash ret jeńip aldy. Sol sebepti ózderiniń kýmırlerin kórý úshin stadıon men onyń mańyndaǵy aýdandarǵa adamdar kóptep jınaldy.

Karnataka shtaty bas mınıstriniń orynbasary D.K. Shıvakýmar adamdardyń qaza tabý faktisin rastady, biraq zardap shekkenderdiń sanyn naqtylaǵan joq.

- Keptelis úshin keshirim suraımyn. Biz 5 myńnan astam qyzmetkerdi jumyldyrdyq. Biz olarǵa qarsy lathı (úndi polıtsııasy qoldanatyn uzyn taıaqtar) paıdalana almaımyz, - dep qosty D.K. Shıvakýmar.

Telearnalar myńdaǵan adamdy kórsetti, olardyń keıbireýleri krıket komandasy avtobýspen jarys alańyna kelgen kezde komandanyń qyzyl jalaýlaryn jelbiretip, stadıonǵa aparatyn kóshelerdi tizip turdy.

Osyǵan deıin Úndistanda nóser jaýynnan 45 adam qaza tapqany týraly jazdyq.