Úndistanda kóshkin men sý tasqynynan 13 adam mert boldy
ASTANA. KAZINFORM — Úndistannyń batysyndaǵy Maharashtra shtatynda sońǵy 48 saǵatta nóserli mýsson jańbyrynan bolǵan kóshkinder men sý tasqyny saldarynan 13 adam qaza taýyp, taǵy 10 adam jaraqat aldy. Tabıǵı apattan ǵımarattarda qırady, dep habarlaıdy Sınhýa.
Shtattyń tótenshe jaǵdaılardyń aldyn alý jáne saldaryn joıý jónindegi mınıstri Gırısh Mahadjannyń aıtýynsha, Mýmbaı qalasy men oǵan kórshiles Palghar jáne Raıgad aýdandaryna rekordtyq jaýyn-shashyn tústi. Bul tabıǵı apattan 13 adam kóz jumǵan.
— Eń kóp zardap shekken aýdan — Mýmbaıdaǵy Mankhýrd. Onda ǵımarattyń opyrylýy saldarynan 6 adam qaza taýyp, bir adam jaraqat aldy, — dedi ol.
Qatty jaýyn men kóshkin shtat aýmaǵyndaǵy temirjol jáne avtomobıl kóliginiń qozǵalysyna da aıtarlyqtaı kedergi keltirdi.
Aıta keteıik, Úndistannyń Tamılnad shtatynda teńiz ónimderin óńdeıtin kásiporynda ammıaktyń taralýynan keminde 7 adam qaza taýyp, 40-tan astam adam zardap shekti.
Bıyl mamyr aıynyń sońǵy kúninde Úndistannyń birneshe shtatynda nóser jańbyr men kúshti daýyl saldarynan bolǵan túrli oqıǵalardan 28 adam qaza tapty.
