Úndistanda kópir opyrylyp, týrıster qaza tapty

ASTANA.KAZINFORM - Úndistannyń Maharashtra shtatynyń Pýna qalasynda kópir opyrylyp, tórt týrıst qaza tapty. Bul týraly shtattyń bas mınıstri Devendra Fadnavıs málim etti, dep habarlaıdy NDTV.

Kópirdiń qulaýy saldarynan taǵy birneshe adam sýǵa batyp ketýi múmkin. 39 adam qutqaryldy.

Oqıǵa jeksenbi kúni mýsson maýsymynda týrıster jappaı keletin tanymal Kýndmal aýdanynda boldy.

Kópir ózenge qulaǵan kezde onyń ústinde ondaǵan adam bolǵan. Olardyń keıbirin aǵys alyp ketkeni habarlandy.

Oqıǵa ornyna polıtsııa men qutqarý toptary, sonyń ishinde Apatqa qarsy áreket etý ulttyq kúshteri (NDRF) jetti.

Fadnavıs marqumdardyń otbasylaryna ótemaqy tólenetinin jáne jaralanǵandardyń emdeý shyǵyndaryn úkimet kóteretinin aıtty.

Sol kezde kópirde bolǵan Amol esimdi kýágerdiń aıtýynsha, kópir qular aldynda bes mınýt boıy shaıqalyp turǵan.

-Men sýda 15 mınýttaı boldym, qubyrdy ustap, shyǵýǵa talpyndym. Birinshi bolyp kómekke jergilikti turǵyndar keldi, - dedi ol NDTV arnasyna.

Jergilikti turǵyndar tórt-bes jyl buryn qaıta salynǵan kópirdiń beriktigine alańdaýshylyq bildirgen. Alaıda kóptegen týrıster qaýipten beıhabar boldy.

Buǵan deıin Úndistannyń soltústigindegi Gımalaı aımaǵynda tikushaq qulaǵan bolatyn.

Sondaı-aq 12 maýsymda bortynda 240-tan astam adamy bar Air India ushaǵy apatqa ushyrady.

Polıtsııa aman qalǵan bir adamdy tapty.