Úndistanda kópir opyrylyp, 9 adam qaza tapty

ASTANA.KAZINFORM - Úndistannyń Gýdjarat shtatyndaǵy Vadodara aýdanynda kópirdiń bir bóligi opyrylyp, 9 adam qaza taýyp, birneshe kólik ózenge qulady, dep habarlaıdy NDTV.

Sársenbi kúni tańerteń Anand pen Vadodara aýdandaryn baılanystyratyn kópir tańerteńgi qarbalas ýaqytynda qulap, 9 adam qaza taýyp, taǵy 3-eýi jaralandy.

Aldyn ala málimet boıynsha, opyrylǵan ýaqytta kópirden tórt kólik ótip bara jatqan: eki júk kóligi, jol talǵamaıtyn Bolero jáne pıkap.

Kýágerlerdiń aıtýynsha, qulaǵanǵa deıin qatty jarylǵan dybys estilgen. Oqıǵa ornyna órt sóndirýshiler, jergilikti polıtsııa qyzmetkerleri men Vadodara aýdany ákimshiliginiń qyzmetkerleri jetti. 

Zardap shekkenderdi qutqarýǵa jergilikti turǵyndar da keldi. Qazirgi ýaqytta úsh adam qutqarylyp, jaqyn mańdaǵy aýrýhanalarǵa jetkizildi.

Jergilikti turǵyndar kópirdi ákimshilik kópten beri elemeı kelgenin alǵa tartady.

Buǵan deıin Úndistannyń Maharashtra shtatynyń Pýna qalasynda kópir opyrylyp, 4 týrıst qaza tapqanyn habarlaǵan edik. 

Sondaı-aq Úndistannyń Madhıa-Pradesh shtatynyń úkimeti quny 200 mıllıon rýpıı (2,3 mıllıon dollar) turatyn kópirdiń jobalyq qatesi úshin 7 ınjenerdi jumystan shettetken edi.