Úndistanda qoqys tapsyrsań tamaq beredi: 1 kg plastıkke – tolyq túski as ishesiń

ASTANA. KAZINFORM — Úndistannyń Ambıkapýr qalasynda Garbage Cafe atty dámhanalar jelisi kelýshilerge túski asty 1 keli plastık qoqysqa aıyrbastap beredi, dep jazdy Kazinform tilshisi Good-ke silteme jasap.

Ortalyq Úndistanda ornalasqan Chhattısgarh shtatyndaǵy Ambıkapýr qalasy búginde ózin «qoqys alańy joq qala» retinde tanytqan. Bul jetistikke, bir jaǵynan, 50 myńnan astam áıeldiń jergilikti kásiporyndarda eńbek etýi yqpal etken. Osylaısha, qala aýmaǵynda polıgon nemese qoqys tógetin arnaıy oryn salýdyń qajettiligi joıylǵan.

Garbage Cafe jelisiniń basshysy Vınod Pateldiń aıtýynsha, olardyń dámhanalarynda kún saıyn 20 adam tamaqtanady, bul — shamamen 20 keli plastık qaldyq jınalady degen sóz.

— Eger plastıktiń ornyna tamaq beriletin bolsa, biz tek ash qaryndardy ǵana toıdyrmaı, qorshaǵan ortany tazartýǵa da úles qosamyz, — dedi Patel.

Osyndaı bastamalar Úndistannyń basqa qalalarynda da júzege asyp jatyr. Al bul ıdeıany Kambodja da qabyldap, qoldana bastaǵan.

Buǵan deıin biz Italııada kólikten qoqys tastaǵany úshin aıyppuldar kúsheıtiletinin jazǵan edik.